АҚШ президенти Жо Байден Исроил бош вазири Бинямин Нетаньяху билан телефон орқали музокара ўтказганини маълум қилди, деб ёзади «РБК».
Фото: Reuters
Америка раҳбарининг айтишича, АҚШ Исроил-Фаластин можаросининг тезроқ тугашига умид қилмоқда.
«Умид қиламанки, низо тугайди. Можаронинг кейинроқ эмас, балки тез орада тугаши мақсадга мувофиқ бўлади», — деди Байден. Шунингдек, Байден ушбу вазиятда Исроил «ўзини ҳимоя қилишга ҳақли» эканини қўшимча қилди.
Исроил-Фаластин ўртасидаги низо 7 май оқшомида кескинлашди. Тўқнашувлар Шарқий Қуддуснинг икки ҳудудида: Маъбад тоғи яқинида ва «Шайх Жарроҳ» маҳалласида содир бўлган. Исроил суди қарори билан у ердаги бир қатор араб оилаларининг чиқариб юборилаётгани норозиликларга сабаб бўлган. 10 май куни Маъбад тоғидаги ал-Ақсо масжидида полиция билан тўқнашувларда 280 га яқин фаластинлик жароҳат олгани ҳақида хабар берилди. Ал-Ақсо масжиди яқинидаги тартибсизликлар фонида ёнғин келиб чиқди.
Исроил полицияси ва фаластинликлар ўртасидаги тўқнашувлардан сўнг Ғазо секторини назорат қилувчи ҲАМАС гуруҳи Исроил ҳудудига ракета ҳужумларини бошлади. Бунга жавобан Исроил ҳарбий ҳаво кучлари Фаластин ҳудудларига авиазарбалар йўллади. Мазкур ҳужумлар оқибатида 12 май ҳолатига кўра, 40 киши — Ғазода 35, Исроилда беш киши ҳалок бўлди.
