Москвадаги АҚШ элчихонаси матбуот котиби Ребекка Росс Россиядан чиқариб юборилмоқда. Бу ҳақда Meduza хабар берди.
Нашрнинг таъкидлашича, Росс Москвадан чиқариб юборилаётган 10 нафар америкалик дипломат рўйхатида бор. Дипломатларни чиқариб юбориш ҳақида 21 апрель куни эълон қилинган эди. Уларга Россияни тарк этиши учун бир ой вақт берилган.
Россия Ташқи ишлар вазирлигининг маълум қилишича, Россни чиқариб юбориш Россиянинг олти ойдан кўпроқ вақт давомида Вашингтондаги элчихонасига матбуот котиби тайинлашига тўсқинлик қилаётган АҚШ хатти-ҳаракатларига жавобдир.
«Биз дипломатик ваколатхонамизнинг матбуот котиби этиб тайинлаган шахс бирор сабаб билан изоҳланмасдан Вашингтонга киритилмаяпти. У илгари Россиянинг бошқа иккита элчихоналарида шу лавозимда ишлаган катта тажрибага эга дипломат. АҚШ ушбу шахс томонидан виза учун тақдим этилган ҳужжатларни шунчаки қайтариб берди, ҳатто уларнинг рад этиш сабабларини изоҳламади. Демак, матбуот котибини чиқариб юбориш Россиянинг ташаббуси эмас», — деди ТИВ.
Росснинг ўзи мамлакатдан чиқариб юборилаётганини тасдиқлади.
Москва ва Вашингтон ўртасидаги муносабатларнинг кескинлашуви сўнгги марта 15 апрель куни, Америка президенти Жо Байден Россияга нисбатан янги санкциялар киритганидан кейин юз берди. Янги санкциялар Россиянинг АҚШдаги 2020 йилги президентлик сайловларига аралашиши, АҚШ ҳукумат идораларига қилинган киберҳужум ва Россиянинг Афғонистондаги америкаликларга қарши «Толибон» жангарилари билан тил бириктиргани билан боғлиқ.
Шунингдек, АҚШ мамлакатдан 10 нафар россиялик дипломат чиқариб юборилиши ҳақида эълон қилди. Бунга жавобан Москва ҳам 10 нафар америкалик дипломатни мамлакатдан чиқариб юбориш тўғрисида ўзаро қарор қабул қилганини эълон қилди.
Дипломатларни чиқариб юбориш билан бир қаторда, Россия АҚШ дипломатик ваколатхоналарига Россия ва учинчи мамлакатлар фуқароларини маъмурий ва техник ишчилар сифатида ёллашни тақиқлади. АҚШ элчиси Жон Салливандан «вазиятни таҳлил қилиш ва маслаҳатлашувлар ўтказиш учун» ўз пойтахтига қайтишни сўради. Аввалига Салливан Кремлнинг тавсияларига қарамай, мамлакатни тарк этишдан бош тортган. Кейинроқ у Вашингтонга қайтиб кетди.
Изоҳ (0)