Microsoft асосчиси Билл Гейтс турмуш ўртоғи Мелинда Гейтс билан ажрашишига тадбиркорнинг америкалик молиячи Жеффри Эпштейн билан алоқалари сабаб бўлиши мумкин, деб ёзмоқда The Wall Street Journal. Эпштейн вояга етмаганларнинг жинсий савдосида айбланган ва 2019 йилнинг август ойида қамоқхонада ўз жонига қасд қилган.
Газета вазиятдан хабардор манбаларга, шунингдек, Билл ва Мелинда Гейтс жамғармасининг собиқ ходимига таяниб ёзмоқда.
Жамғарма собиқ ходимининг сўзларига кўра, Мелинданинг бу борадаги хавотирлари 2013 йилда, Билл Эпштейн билан танишганидан кейин пайдо бўлган. Мелинда турмуш ўртоғига ўз хавотирлари ҳақида айтган, лекин у Эпштейн билан кўришишда давом этаверган.
The Wall Street Journal’нинг хабар беришича, Мелинда Гейтс турмуш ўртоғи билан ажрашиш ҳақида 2019 йилдаёқ маслаҳатлашган. Нашрнинг аниқлик киритишича, Мелинда ўз никоҳини «тиклаб бўлмас даражада барбод бўлган» деб атаган.
Хусусан, Мелинда 2019 йилнинг октябрь ойида ўз адвокатлари билан бир неча марта телефон орқали гаплашган, айнан шу вақтда The New York Times газетаси Билл Гейтс ва Жеффри Эпштейн ҳақида мақола чиқарган эди. Мақолада уларнинг бир неча марта учрашгани тасдиқланган. The New York Times газетасининг маълумотларига кўра, бу муносабатлар Эпштейннинг жинсий жиноятларда айбланганидан кейин бошланган.
Ўшанда Билл Гейтснинг вакили Брижитт Арнольд икки тадбиркорнинг хайрия масаласида ҳамкорлик қилганини айтган эди. Арнольднинг сўзларига кўра, Гейтс бундан афсусланган ва Эпштейн билан учрашувлар хато бўлганини тан олган.
7 май куни Гейтснинг вакили The Wall Street Journal газетасига тадбиркорнинг 2019 йилги баёнотига ҳеч қандай қўшимча қўшмаганини маълум қилди.
Маълумот учун, 3 май куни Билл ва Мелинда Гейтснинг ажрашиши ҳақида маълум бўлди. Эр-хотин бундай қарорни «узоқ ўйлаб, муносабатларини чуқур таҳлил қилгандан кейин» қабул қилганини таъкидлади. Билл Гейтснинг аниқлик киритишича, у ва Мелинда энди ҳаётнинг кейинги босқичларида бир оила бўлиб давом эта олишига ишонмайди.
Уларнинг ўртасида мол-мулк қандай бўлиниши ҳали расман эълон қилинмади. Bloomberg агентлигининг маълум қилишича, Cascade Investment жамғармаси (Билл Гейтс бир қатор йирик компанияларнинг акцияларига эгалик қилувчи жамғарма) 3 май куни 1,8 миллиард долларлик қимматли қоғозларни Мелинданинг номига ўтказиб берган. Битим Гейтс мулкини тақсимлаш билан боғлиқ бўлиши мумкин, чунки улар ўша куни ажрашиш ҳақида эълон қилган.
Bloomberg маълумотларига кўра, Мелинда Канада миллий темир йўл ва АҚШнинг энг йирик автомобиль сотувчиси бўлган Autonation компанияларининг акцияларига эга бўлди.
Изоҳ (0)