Microsoft asoschisi Bill Geyts turmush o‘rtog‘i Melinda Geyts bilan ajrashishiga tadbirkorning amerikalik moliyachi Jeffri Epshteyn bilan aloqalari sabab bo‘lishi mumkin, deb yozmoqda The Wall Street Journal. Epshteyn voyaga yetmaganlarning jinsiy savdosida ayblangan va 2019-yilning avgust oyida qamoqxonada o‘z joniga qasd qilgan.
Gazeta vaziyatdan xabardor manbalarga, shuningdek, Bill va Melinda Geyts jamg‘armasining sobiq xodimiga tayanib yozmoqda.
Jamg‘arma sobiq xodimining so‘zlariga ko‘ra, Melindaning bu boradagi xavotirlari 2013-yilda, Bill Epshteyn bilan tanishganidan keyin paydo bo‘lgan. Melinda turmush o‘rtog‘iga o‘z xavotirlari haqida aytgan, lekin u Epshteyn bilan ko‘rishishda davom etavergan.
The Wall Street Journal’ning xabar berishicha, Melinda Geyts turmush o‘rtog‘i bilan ajrashish haqida 2019-yildayoq maslahatlashgan. Nashrning aniqlik kiritishicha, Melinda o‘z nikohini “tiklab bo‘lmas darajada barbod bo‘lgan” deb atagan.
Xususan, Melinda 2019-yilning oktabr oyida o‘z advokatlari bilan bir necha marta telefon orqali gaplashgan, aynan shu vaqtda The New York Times gazetasi Bill Geyts va Jeffri Epshteyn haqida maqola chiqargan edi. Maqolada ularning bir necha marta uchrashgani tasdiqlangan. The New York Times gazetasining ma’lumotlariga ko‘ra, bu munosabatlar Epshteynning jinsiy jinoyatlarda ayblanganidan keyin boshlangan.
O‘shanda Bill Geytsning vakili Brijitt Arnold ikki tadbirkorning xayriya masalasida hamkorlik qilganini aytgan edi. Arnoldning so‘zlariga ko‘ra, Geyts bundan afsuslangan va Epshteyn bilan uchrashuvlar xato bo‘lganini tan olgan.
7-may kuni Geytsning vakili The Wall Street Journal gazetasiga tadbirkorning 2019-yilgi bayonotiga hech qanday qo‘shimcha qo‘shmaganini ma’lum qildi.
Ma’lumot uchun, 3-may kuni Bill va Melinda Geytsning ajrashishi haqida ma’lum bo‘ldi. Er-xotin bunday qarorni “uzoq o‘ylab, munosabatlarini chuqur tahlil qilgandan keyin” qabul qilganini ta’kidladi. Bill Geytsning aniqlik kiritishicha, u va Melinda endi hayotning keyingi bosqichlarida bir oila bo‘lib davom eta olishiga ishonmaydi.
Ularning o‘rtasida mol-mulk qanday bo‘linishi hali rasman e’lon qilinmadi. Bloomberg agentligining ma’lum qilishicha, Cascade Investment jamg‘armasi (Bill Geyts bir qator yirik kompaniyalarning aksiyalariga egalik qiluvchi jamg‘arma) 3-may kuni 1,8 milliard dollarlik qimmatli qog‘ozlarni Melindaning nomiga o‘tkazib bergan. Bitim Geyts mulkini taqsimlash bilan bog‘liq bo‘lishi mumkin, chunki ular o‘sha kuni ajrashish haqida e’lon qilgan.
Bloomberg ma’lumotlariga ko‘ra, Melinda Kanada milliy temiryo‘l va AQShning eng yirik avtomobil sotuvchisi bo‘lgan Autonation kompaniyalarining aksiyalariga ega bo‘ldi.
Izoh (0)