Американинг SpaceX компанияси 2022 йилда Dogecoin криптовалютаси билан молиялаштирилган шартнома бўйича Ойга сунъий йўлдош учиради. Бу ҳақда компания раҳбари Илон Маск ўзининг Twitter саҳифасида маълум қилди.
«SpaceX Ойга Doge-1 сунъий йўлдошини кейинги йилда учиради. Миссия учун Doge воситасида тўлов қилинган», — деб ёзган Маск.
Сунъий йўлдошнинг эгаси бўлган Канаданинг Geometric Energy Corporation (GEC) ҳам Doge-1’нинг Ойга парвози тўлиқ Dogecoin криптовалютаси билан молиялаштирилишини маълум қилди. Компания сайтида ёзилишича, парвоз 2022 йилнинг биринчи чорагига режалаштирилган. Компания сунъий йўлдошни Ойга SpaceX таклиф қилган тижорат космик кемаларини учириш дастури ёрдамида юборади.
«Бундай кўламдаги битим учун расмий равишда Doge орқали тўлов қилиб, Geometric Energy Corporation ва SpaceX Doge’ни коинот соҳасидаги Ой бизнесини юритишда ҳисоб-китоб учун пул бирлиги сифатида мустаҳкамлади», — деди GEC’нинг бош ижрочи директори Самюуэль Рид.
Dogecoin 2013 йилда ҳазил тариқасида яратилган криптовалюта бўлиб, бугунги кунда ушбу рақамли тангаларнинг капитализацияси 80 миллиард долларни ташкил қилади. У капитализацияси энг юқори криптовалюталар рўйхатининг тўртинчи ўрнида туради.
Аввалроқ Маск ўзининг твитларида бир неча марта Dogecoin’ни тилга олиб ўтган. Масалан, апрель ойининг ўрталарида SpaceX раҳбари Twitter’га испаниялик рассом Жоан Миронинг «Dog Barking at the Moon» («Ойга қараб ҳураётган кучук») асарини жойлаштириб, постга «Doge Barking at the Moon» («Ойга қараб ҳураётган Doge») деб изоҳ қолдирган эди. Шундан кейин Dogecoin икки баробарга қимматлади. Апрель ойининг охирида, Маскнинг навбатдаги твитидан кейин, криптовалютанинг нархи бир соат ичида 24 фоизга кўтарилди.
Илон Маск сиба-ину зотидаги кучук боласини излаётганини ёзгач, Shiba Inu криптовалютаси бир соат ичида 68 фоизга қимматлади.
Маълумот учун, Илон Маск карбонат ангидридни тежамкор равишда ёқилғига айлантириш йўлини топадиган ихтирочига 100 миллион доллар ваъда қилган эди. Маскнинг сўзларига кўра, вақт ўтиши билан соврин миқдори ошиши мумкин. У атмосферадан углерод ажратиб олиш технологияси ҳаводан ифлослантирувчи заҳарли газлар ажралиб чиқиш даражасини 2050 йилга қадар нолга етказишда жуда муҳим бўлиши мумкинлигини таъкидлади.
Январь ойида Илон Маск Марсда колония ташкил қилиш йўлида ўзининг барча давлатини сотиб юборишга тайёрлигини маълум қилганди. Бизнесменнинг айтишича, унинг Марсда шаҳар қуриш режаси анча катта маблағни талаб этади. Унинг сўзларига кўра, бу уни ўз бойлиги билан хайрлашишга ундовчи сабаблардан биридир. Яна бир сабаб сифатида Маск Марсда колония ташкил қилиш борасида қанчалик қатъий қарорга эга эканлигини бутун дунёга намойиш қилиш истагидалигини кўрсатди.
Шунингдек, Илон Маск Марсда мустақил фаолият юритадиган манзил қуришга 20 йил кетишини тахмин қилган эди. Унинг сўзларига кўра, бундай манзил қуриш учун 1000 га яқин Starship кемаси ва камида 3 миллион тонна ресурс ва жиҳозлар керак бўлади.
Изоҳ (0)