Ўзбекистон ташқи ишлар вазири Абдулазиз Комилов 10 май куни Франциянинг Европа ва ташқи ишлар вазирлиги ҳузуридаги ташқи савдо ва иқтисодий жозибадорлик бўйича вакил-вазири Франк Риэстер бошчилигидаги делегация билан учрашди, деб хабар бермоқда ТИВ матбуот хизмати.
Маълум қилинишича, Франция делегацияси Савдо-иқтисодий ҳамкорлик бўйича Ўзбекистон—Франция ҳукуматлараро комиссиясининг 8-йиғилишида иштирок этиш учун Тошкентга келган.
Музокаралар якунида делегациялар раҳбарлари Ўзбекистон ва Франция Ташқи ишлар вазирликлари ўртасида 2021—2022 йилларга мўлжалланган ҳамкорлик дастурини имзолади. Суҳбат давомида сиёсий, савдо-иқтисодий, маданий-гуманитар ва бошқа соҳалардаги икки томонлама муносабатларнинг ҳолати ва ривожланиш истиқболлари ҳам муҳокама қилинди.
Франция томони 2022 йил кузида Париждаги Лувр музейида «Марказий Осиё улуғворлиги. Ўзбекистон карвон йўлларида» номли кўргазмани ташкиллаштиришда ҳар томонлама ёрдам беришга тайёрлигини билдирди. Мазкур тадбир икки мамлакат маданий ҳаётидаги ёрқин воқеага айланиши қайд этилди.
Эслатиб ўтамиз, дунёдаги энг йирик бадиий музейлардан бири — Лувр Ислом санъати бўлимида Ўзбекистон экспозициялари кўргазмага қўйилиши бошлаб юборилгани ҳақида 2018 йилда маълум бўлганди. Франциялик вакиллар тайёргарлик уч йил вақт олиши, кўргазманинг ўзи эса Ўзбекистон тарихий меросининг Европадаги энг йирик намойишига айланишини таъкидлаган.
Ушбу кўргазмани ташкиллаштириш иши билан бугун музей ходимлари, Ўзбекистон Маданият вазирлиги қошидаги Маданият ва санъатни ривожлантириш фонди, Ўзбекистоннинг Франциядаги элчихонаси шуғулланмоқда.
Лувр музейи Парижнинг энг диққатга сазовор масканларидан бири ҳисобланади. Унда санъат ва маданиятга оид 400 мингдан зиёд экспонат сақланади.
Изоҳ (0)