O‘zbekiston tashqi ishlar vaziri Abdulaziz Komilov 10-may kuni Fransiyaning Yevropa va tashqi ishlar vazirligi huzuridagi tashqi savdo va iqtisodiy jozibadorlik bo‘yicha vakil-vaziri Frank Riester boshchiligidagi delegatsiya bilan uchrashdi, deb xabar bermoqda TIV matbuot xizmati.
Ma’lum qilinishicha, Fransiya delegatsiyasi Savdo-iqtisodiy hamkorlik bo‘yicha O‘zbekiston—Fransiya hukumatlararo komissiyasining 8-yig‘ilishida ishtirok etish uchun Toshkentga kelgan.
Muzokaralar yakunida delegatsiyalar rahbarlari O‘zbekiston va Fransiya Tashqi ishlar vazirliklari o‘rtasida 2021—2022-yillarga mo‘ljallangan hamkorlik dasturini imzoladi. Suhbat davomida siyosiy, savdo-iqtisodiy, madaniy-gumanitar va boshqa sohalardagi ikki tomonlama munosabatlarning holati va rivojlanish istiqbollari ham muhokama qilindi.
Fransiya tomoni 2022-yil kuzida Parijdagi Luvr muzeyida “Markaziy Osiyo ulug‘vorligi. O‘zbekiston karvon yo‘llarida” nomli ko‘rgazmani tashkillashtirishda har tomonlama yordam berishga tayyorligini bildirdi. Mazkur tadbir ikki mamlakat madaniy hayotidagi yorqin voqeaga aylanishi qayd etildi.
Eslatib o‘tamiz, dunyodagi eng yirik badiiy muzeylardan biri — Luvr Islom san’ati bo‘limida O‘zbekiston ekspozitsiyalari ko‘rgazmaga qo‘yilishi boshlab yuborilgani haqida 2018-yilda ma’lum bo‘lgandi. Fransiyalik vakillar tayyorgarlik uch yil vaqt olishi, ko‘rgazmaning o‘zi esa O‘zbekiston tarixiy merosining Yevropadagi eng yirik namoyishiga aylanishini ta’kidlagan.
Ushbu ko‘rgazmani tashkillashtirish ishi bilan bugun muzey xodimlari, O‘zbekiston Madaniyat vazirligi qoshidagi Madaniyat va san’atni rivojlantirish fondi, O‘zbekistonning Fransiyadagi elchixonasi shug‘ullanmoqda.
Luvr muzeyi Parijning eng diqqatga sazovor maskanlaridan biri hisoblanadi. Unda san’at va madaniyatga oid 400 mingdan ziyod eksponat saqlanadi.
Izoh (0)