Онлайн шаклда бўлиб ўтаётган 2021 йилги Жаҳон вакцинаси конгресси мутахассислари коронавирусга қарши энг яхши вакцина сифатида Американинг Moderna компанияси препаратини танлади. Бу ҳақда конгресс веб-сайтига таяниб, «РБК» хабар берди.
«Энг яхши COVID вакцинаси» мукофотининг қисқа рўйхатидан Россиянинг «Спутник V» вакцинаси, Американинг Janssen ва Novavax, Канаданинг Medicago, AstraZeneca инглиз-швед компанияси препарати, Pfizer / BioNTech вакцинаси, Bharat Biotech ҳинд фармацевтика компанияси вакцинаси ва ҳайвонлар учун Zoetis дори воситалари ўрин олди. Шу билан бирга, Pfizer ва BioNTech компанияси маҳсулоти «юқори баҳоланди».
Мутахассислар «Вакцинанинг энг яхши янги технологияси/платформаси» йўналиши бўйича ҳам Moderna вакцинасини танлади. Танлов қайси тамойил асосида ўтказилганига аниқлик киритилмаган.
Жаҳон вакцинаси конгресси — препаратларни ишлаб чиқариш ва тарқатиш масалалари билан шуғулланадиган халқаро экспертлар ва олимлар иштирокидаги бир қатор конференциялар бўлиб, ўз фаолиятини бошлаганига 20 йилдан ошди.
Moderna ўз вакцинасини АҚШда 2020 йилнинг 16 декабрида тасдиқлатган эди, бир неча кун ўтиб ушбу препарат Европа Иттифоқида ҳам маъқулланган. Шунингдек, компания Буюк Британия, Канада, Япония, Жанубий Корея, Швейцария, Исроил ва бошқа бир қатор давлатлар билан вакцина етказиб бериш бўйича шартнома имзолаган.
30 апрель куни Жаҳон соғлиқни сақлаш ташкилоти (ЖССТ) Moderna вакцинасини фавқулодда вазиятларда фойдаланиш учун тавсия этилганлар рўйхатига қўшди. Ташкилот хабарига кўра, препарат тўғрисидаги маълумотлар иммунизация бўйича стратегик маслаҳат гуруҳи (SAGЕ ) томонидан ўрганилган.
Улар препаратни 18 ва ундан катта ёшдагиларга қўллаш тавсия қилинди. SAGЕ маълумотларига кўра, вакцина самарадорлиги 94,1 фоизни ташкил этган.
Ишлаб чиқарувчилар фикрига кўра, Pfizer / BioNTech вакцинасининг самарадорлиги 90 фоиз, AstraZeneca – 70 фоиз, «Спутник V» – 97 фоиздан ошади.
Изоҳ (0)