АҚШ ва Хитой ўртасида ҳарбий қарама-қаршилик икки давлат учун ҳам наф келтирмайди. Бу ҳақда АҚШ давлат котиби Энтони Блинкен CBS телеканалига берган интервьюсида айтиб ўтди.
«Ҳарбий қарама-қаршилик даражасига келиш ёки шу йўналишда ҳаракат қилиш Хитойнинг ҳам, АҚШнинг ҳам манфаатларига мутлақо зиддир», — деди Блинкен. Шу билан бирга, давлат котибининг фикрича, сўнгги бир неча йил ичида Пекин «ўз ҳудудида янада золим ва чет давлатларда янада тажовузкор» бўла бошлади.
«Хитойнинг мақсади дунёда ҳукмронлик қилиш», — дея қўшимча қилди Блинкен.
Давлат департаменти раҳбари Қўшма Штатларнинг мақсади Хитойни жиловлаш эмаслигини айтди. Унга кўра, Вашингтон белгиланган тартибни сақлашга ҳаракат қилмоқда, Хитой эса бунга қарши чиқмоқда.
Март ойининг охирида Блинкен АҚШ Хитой билан муносабатларни куч нуқтаи назаридан ўрнатиш ниятидалигини маълум қилди. У мамлакатлар ўртасидаги рақобат кучайиб бораётганига ишора қилди. Шунингдек, агар Қўшма Штатлар ва унинг иттифоқчилари «Хитойнинг қаршиликларига биргаликда ёндашишни кучайтирса», уларга қарши яхшироқ курашиш имконияти ошишини таъкидлади.
Хитой раҳбари Си Цзиньпин икки мамлакат ўртасидаги ҳамкорликни «ягона тўғри танлов» деб атаган, чунки Вашингтон ва Пекин ўртасидаги зиддият бутун дунё учун фалокат бўлади. Америка президенти Жо Байден эса Хитой АҚШнинг «энг жиддий рақиби» эканини айтган. Апрель ойи охирида Байден Конгресс олдида нутқ сўзлар экан, Қўшма Штатлар XXI асрда етакчилик учун бошқа давлатлар, жумладан, Хитой билан рақобатлашаётганини таъкидлаган.
Аввалроқ Энтони Блинкен Хитой билан муносабатларни АҚШ учун энг муҳим деб атаган эди. Унинг таъкидлашича, айни пайтда икки давлат тобора душманга айланиб бормоқда.
Изоҳ (0)