Бангладешнинг Падма дарёсида моторли қайиқ ва баржа (юк кемаси)нинг тўқнашуви камида 28 кишининг ҳаётига зомин бўлди. Беш киши қутқариб олинди, деб ёзади «РБК».
Хабарга кўра, кемалар дарёнинг Шибчар шаҳридан ўтувчи қисмида тўқнашган. Қум ортилган баржа билан тўқнашувдан сўнг, қайиқ ағдарилиб кетган. 28 қурбоннинг жасади сувдан чиқарилган, уларнинг уч нафари болалар ва бир нафари аёл киши. Қутқарув ишлари давом этмоқда.
Шунингдек, АҚШнинг Калифорния штати Сан-Диего шаҳри соҳиллари яқинида ёғоч қайиқ ағдарилиб кетиб, тўрт киши ҳалок бўлди, 20 дан ортиқ киши жароҳатланди.
Сан-Диего чегара ва божхона хизмати маълум қилишича, қайиқ Мексикадан АҚШга ноқонуний муҳожирларни ташиб кетаётган эди.
Қутқарувчиларнинг сўнгги маълумотларига кўра, қайиқда ҳаммаси бўлиб 30 киши бўлган. Тахминларга кўра, ёғоч қайиқ сувости қоясига урилиб, парчаланиб кетган ва 30 киши сувга қулаган. Кўпчилик қирғоққа ўзи сузиб чиқишга муваффақ бўлган, олти киши қутқарув гуруҳи ёрдамида чиқариб олинган.
ABC7 News агентлиги қайиқни бошқарган эркак ҳибсга олингани ҳақида хабар берди.
https://twitter.com/SDFD/status/1388992321601949696
Аввалроқ Сан-Диего ёнғин хизмати 25 киши сувдан олиб чиқилгани, улардан иккитаси вафот этгани, қолганлар касалхонага етказилгани ҳақида хабар берган эди.
Эслатиб ўтамиз, 21 апрель куни Индонезиянинг Бали ороли яқинидаги ўқув машғулотларда KRI Nanggala 402 сувости кемаси билан алоқа узилиб қолган ва у бедарак йўқолган. Кейинчалик АҚШ Индонезиянинг ғойиб бўлган сувости кемасини қидириш учун авиация юбориши, бедарак йўқолган сувости кемасида кислород тамом бўлгани ҳақида хабарлар берилган. Содир бўлган воқеанинг келиб чиқиш сабаблари юзасидан расмий тахминлар билдирилмаган.
Изоҳ (0)