Қашқадарё прокурори: Вилоятда 75 млрд сўм бюджет маблағлари талон-торож қилинган
Қашқадарёда 2020 йил ва 2021 йилнинг биринчи чорагида коррупция ва бюджет маблағларини талон-торож қилиш бўйича 278 та жиноят содир этилиб, оқибатда 75 миллиард сўм бюджет пули ўзлаштириб олинган. Бу ҳақда вилоят прокурори Эркабой Тожиев маълум қилди, дея хабар берди «Дарё» мухбири.
Маълум бўлишича, 30 апрель, жума куни Қашқадарё вилояти ҳокимлигида Олий Мажлис Сенати, Коррупцияга қарши курашиш агентлиги ва Ҳисоб палатаси ҳамкорлигида вилоятда коррупциянинг олдини олиш, молиявий интизомни кучайтириш, бюджет даромадларини ошириш ва энергия ресурсларидан қонуний фойдаланиш бўйича ўрганишлар натижасига бағишланган ҳисобот йиғилиши бўлиб ўтган.
Унда сўз олган вилоят прокурори Эркабой Тожиев вилоятда бюджет маблағларини талон-торож қилишда «ташаббус кўрсатаётган» ташкилотлар номини ошкор қилган.
«Бюджет маблағларини талон-торож қилиш ҳолатлари халқ таълими тизимида кўп бўлиб, тизимда фаолият юритувчи ходимлар 14 миллиард 600 миллион сўм маблағни ўзлаштирган бўлса, соғлиқни сақлаш тизимида салкам бир миллиард сўм, мактабгача таълим тизимида 312 миллион сўм, тижорат банкларида 22 миллиард 285 миллион сўм, маҳалла тизимида 2 миллиард сўм, хўжалик бошқаруви ташкилотларида 24 миллиард 290 миллион сўмни ташкил қилмоқда. Жами ҳисобда 75 миллиард сўм талон-торож қилинган. Бу вилоят учун кам маблағ эмас», — деди вилоят прокурори.
Эркабой Тожиевнинг маълумот беришича, вилоятда 75 миллиард сўмдан ортиқ талон-торожликка йўл қўйганлар 333 нафарни ташкил этиб, 218 та жиноят иши судга оширилган, 60 та жиноят иши бўйича тергов ҳаракатлари давом этмоқда.
«Коррупция ҳолатлари асосан халқ таълими тизимида 83 нафар, тижорат банкларида 40 нафар, соғлиқни сақлаш тизимида 28 нафар, маҳалла идораларида 20 нафар ва мактабгача таълим тизимида 14 нафар шахс томонидан содир этилган. Прокуратура ходимлари томонидан 2020 йил ва 2021 йилнинг биринчи чорагида давлат идора ва ташкилотларида ўтказилган текширишлар давомида 401 нафар мансабдор қонун бузилишига йўл қўймаслиги ҳақида огоҳлантирилган. 66 нафар мансабдор интизомий, 259 нафар шахснинг маъмурий жавобгарлиги ҳал этилган. Қўпол қонунбузилиши ҳолатлари юзасидан 26 та жиноят иши қўзғатилган», — деди Эркабой Тожиев.
