Мустақиллик майдонидаги деярли 2 йил ишламаган фавворанинг қайта ишга туширилиши — суратларда

1 май — Фавворалар куни муносабати билан бугун Тошкент шаҳрининг Мустақиллик майдонидаги фаввора ўз ишини қайта тиклади. Унинг очилишида Тошкент шаҳар ҳокимининг ўринбосари Фурқат Маҳмудхўжаев иштирок этди. Бу ҳақда «Дарё» мухбири хабар бермоқда.

Вазирлар Маҳкамаси биносининг ёнидаги мазкур фавворанинг қурилганига 50 йилдан ошган. Айрим жойлари дарз кетганидан сўнг тўлиқ таъмирдан чиқарилганидан деярли 2 йил ўтиб яна ташриф буюрувчиларни ўз бағрига чорлади. Айтиш керакки, 2019 йилда ижтимоий тармоқлар орқали кутилмаганда Мустақиллик майдонидаги фавворанинг олиб ташланаётгани ҳақида хабарлар пайдо бўлган, Тошкент шаҳар ҳокимлиги уларни рад этиб, бу ерда тўлиқ таъмирлаш ишлари олиб борилаётгани, фаввора 8 баробар кўп электроэнергия истеъмол қилаётгани, қурилиш-монтаж ишлари сабаб электр янада тежалиши ҳамда йил охирига қадар таъмирланиб, замонавий кўринишда қайта ишга туширилишини маълум қилган эди.

2019 йил 16 январда Тошкент шаҳар ҳокимининг «Тошкент шаҳридаги фавворалар ҳолатини яхшилаш ва реконструкция қилиш тўғрисида»ги қарори қабул қилинди. Унга кўра, «Тошкент фаввораси» давлат унитар корхонаси балансидаги фаввораларни капитал таъмирлаш, ободонлаштириш ва реконструкция қилиш белгиланди. Шунингдек, фавворалар атрофидаги ҳудудларга шартнома асосида тижорат ва кўнгил очиш объектларини жойлаштириш, бунда давлат-хусусий шериклик тамойили билан тадбиркорлик субъектларига беғараз уч йилдан ўн йилгача бўлган муддатга топширилишга розилик берилган эди. Ўша йилнинг ўзида, май ойида пойтахтдаги 117 фавворанинг нечтаси ишламаслиги айтилган.