Ўзбекистонда ўтган бир сутка ичида 80 мингга яқин киши коронавирусга қарши эмланди

Ўзбекистон ҳудудлари бўйлаб 30 апрель куни жами 79 310 киши COVID-19’га қарши эмланди, деб хабар бермоқда Соғлиқни сақлаш вазирлиги матбуот хизмати. Бу вакцинация бошлангандан бери энг юқори кўрсаткичдир.

Шу тариқа айни кунгача Ўзбекистонда коронавирус инфекциясига қарши эмланган фуқаролар сони 797 781 нафарга етди.

30 апрель кунидаги эмлаш кўрсаткичлари бўйича юқори ўринларни

• Фарғона вилояти (12 685 нафар),
• Андижон вилояти (10 026 нафар),
• Наманган вилояти (9397 нафар),
• Самарқанд вилояти (7779 нафар) банд қилди.

Таъкидланишича, ҳозирга қадар жами эмланганлар сони бўйича рекорд кўрсаткич Фарғона вилоятида (117 843 нафар) қайд этилган. Наманган вилоятида бу кўрсаткич 84 874 нафарни, Андижон вилоятида эса 82 262 нафарни ташкил қилмоқда.Вакцинациянинг илк ойида қанча ўзбекистонлик коронавирусга қарши эмланди?

Ўзбекистонда коронавирусга қарши эмлаш 1 апрелдан бошланди. Хусусан:

• Мамлакат бўйлаб 3 138 та эмлаш пунктлари ва 862 та ҳаракатдаги тиббий бригадалар шай ҳолатга келтирилди.
• Ҳудудларга вакциналарни ташиш учун COVAX дастури доирасида 17 та авторефрижератор, 206 та юк ташувчи минивен ва 16 та енгил автотранспорт воситалари олиб келинди.
• Эмлаш жараёнлари учун 4 минг нафардан ортиқ шифокор ва 11 минг нафардан ортиқ ўрта тиббиёт ходими жалб қилинди.
• Вакцинация жараёнлари учун ZF-UZ-VAC2001 вакцинасининг 1 миллион дозалик ва AstraZeneca вакцинасининг 660 минг дозалик захираси шакллантирилди.

Дастлабки режага кўра, апрель ойи давомида Тошкент ва Нукус шаҳри ҳамда вилоят марказларидаги 219 та эмлаш пунктларида биринчи навбатда 65 ёшдан катталар ва коронавирус инфекциясини юқтириб олиш хавфи юқори бўлган тиббиёт ходимларини ихтиёрий тарзда эмлаш кўзда тутилган эди.

Вакцинациянинг илк кунида 5018 нафар ўзбекистонлик коронавирусга қарши ҳимояланган. Уларнинг 1871 нафари 65 ёш ва ундан ошган аҳоли қатлами бўлса, 3147 нафари тиббиёт ходими эди. Вакцинациянинг биринчи ўн кунлигида 148 минг нафардан ошиқ аҳоли эмланган бўлса, иккинчи ўн кунлик якунида 458 минг нафардан ортиқ аҳоли эмланган.

Бир ой давомида қайси ҳудудда қанча аҳоли эмланди?

Ўзбекистонда эмлаш жараёнлари бошланганда

• биринчи галда Қорақалпоғистон Республикаси, вилоятлар марказлари, Тошкент шаҳри ва бошқа катта шаҳарларда оммавий эмлаш тадбирларини амалга ошириш,
• кейинчалик туман марказлари ва кичик шаҳарлар аҳолисини оммавий эмлаш тадбирларини амалга ошириш,
• ундан сўнг эса бошқа ҳудудларни оммавий эмлаш тадбирлари билан қамраб олиш кўзда тутилганди.

Кейинчалик эмланиши режалаштирилган хавф ости гуруҳига мансуб аҳоли қатламида коронавирусга қарши эртароқ эмланишга хоҳиш пайдо бўлса, эмлаш пунктларига мурожаат қилишлари ва белгиланган кунда келиб эмланишлари белгиланган эди.

Ушбу режа асосида апрель ойида Қорақалпоғистон Республикаси, вилоятлар марказлари, Тошкент шаҳри ва бошқа катта шаҳарларда фақатгина 65 ёш ва ундан ошган фуқаролар ва тиббиёт ходимлари оммавий эмлаш тадбирларига жалб қилинган бўлса, кейинчалик туман марказлари ва кичик шаҳарларда яшовчи аҳоли ҳам эмлашга жалб этилди.

27 апрель кунидан бошлаб хавф ости гуруҳига киритилган яна учта аҳоли қатлами (мактаб ва мактабгача таълим муассасалари ходимлар, сурункали касаллиги борлар) ҳам эмлана бошланди. Вакцинациянинг илк кунида кунлик ҳисобда Тошкент шаҳридан 1651 нафар фуқаро эмланиб, ҳудудлар бўйича энг юқори кўрсаткич қайд этган бўлса, кейинчалик вакцина олиш бўйича мутлақ етакчиликни Фарғона вилояти эгаллади.

Жумладан, 12 апрелда бир куннинг ўзида Фарғонада 18 минг нафардан ортиқ фуқаро эмланиб, кунлик кўрсаткичлар бўйича рекорд қайд этилди.

Вакцинациянинг иккинчи ўн кунлигида Фарғона, Наманган, Андижон ва Самарқанд вилоятларида эмланиш кўрсаткичи 40 минг нафардан ошган эди. Улардан кейинги ўринларни Қашқадарё, Сурхондарё ва Тошкент вилоятлари эгаллаб келмоқда.

Апрель ойи якунига келиб, Фарғона вилоятида ҳудудлар орасида биринчи бўлиб 100 минг нафардан ортиқ аҳоли эмланиб, яна бир рекорд қайд этилди.