Uzbekistan Airways май ойида Туркияга амалга ошириладиган қатор рейсларни бекор қилди

Uzbekistan Airways АЖ эпидемиологик вазият ёмонлашуви ҳамда Туркия ҳукумати томонидан 3 ҳафталик локдаун эълон қилингани сабабли май ойида ушбу мамлакатга амалга оширадиган қатор рейсларини бекор қилди. Бу ҳақда Ўзбекистоннинг Истанбулдаги Бош консулхонаси хабар берди.

Хусусан, 14 май куни Тошкент—Истанбул—Тошкент йўналиши бўйича амалга оширилиши керак бўлган HY273-274 рейслари бекор қилинган. Шунингдек, Ўзбекистоннинг қуйидаги вилоятларидан амалга ошириладиган рейслар ҳам вақтинча тўхтатилди:

• Самарқанд—Истанбул—Самарқанд йўналиши бўйича 5, 7, 10, 12 ва 14 май кунларидаги парвозлар;
• Фарғона—Истанбул—Фарғона йўналиши бўйича 1, 5 , 8, 12 ва 15 май кунларидаги парвозлар;
• Урганч—Истанбул—Урганч йўналиши бўйича 2, 9 ва 16 май кунларидаги парвозлар.

Аввалроқ Россия 15 апрелдан 1 июнгача Туркияга доимий ва чартер рейсларни тўхтатиши ҳақида эълон қилганди. Шунингдек, Россия билан бир қаторда Хитой ва бошқа мамлакатлар ҳам Туркия билан парвозларни тўхтатишга қарор қилди. Хитой фуқаро авиацияси маъмурияти (CААC) турк авиакомпанияларига 19 апрелдан бошлаб тўрт ҳафта давомида парвозларни тўхтатишга буйруқ берилганини эълон қилди.Эслатиб ўтамиз, Туркия президенти Ражаб Тоййиб Эрдўғон мамлакатда коронавирус эпидемиясининг авж олиши муносабати билан 29 апрелдан 17 майгача тўлиқ локдаун жорий этилишини эълон қилган эди. Чекловлар 29 апрель, пайшанба куни соат 19:00 дан кучга киради ва 17 май, душанба куни соат 05:00 да тугайди. Мамлакат туризм вазири Нури Эрсой ушбу локдаун хорижлик сайёҳларга тааллуқли бўлмаслигини маълум қилган.