Азизхон Маҳсумов Андижон вилояти ҳокимининг туризм, спорт, маданият, маданий мерос ва оммавий коммуникациялар масалалари бўйича ўринбосари — вилоят туризм ва спорт бош бошқармаси бошлиғи лавозимига тайинланди. Бу ҳақда вилоят ҳокимлиги матбуот хизмати хабар берди.
Азизхон Маҳсумов 1992 йилда Андижон шаҳрида туғилган. 2013 йилда Осиё-Тинч океани Технология ва инновация университети (Малайзия), 2017 йилда Тошкент давлат иқтисодиёт университетини (магистратура) тамомлаган.
Меҳнат фаолиятини 2013 йилда Хусусийлаштириш, монополиядан чиқариш ва рақобатни ривожлантириш давлат қўмитаси рақобат муҳитини ривожлантириш ва ноҳалол рақобатга йўл қўймаслик бошқармаси биринчи тоифали мутахассиси вазифасидан бошлаган.
Шунингдек, бунга қадар Андижон вилояти ҳокимининг туризм ва спортни ривожлантириш масалалари бўйича маслаҳатчиси, Туризмни ривожлантириш давлат қўмитасининг Ҳудудий бўлинмалар фаолиятини мувофиқлаштириш бошқармаси бошлиғи вазифаларида фаолият юритган.
Аввалроқ Тошкент шаҳар ҳокимига янги ўринбосар, Сурхондарё вилояти ҳокими Тўра Боболовга янги ўринбосар, Қашқадарё ҳокими Зоир Мирзаевга биринчи ўринбосар ҳамда Ўзбекистон туризм ва спорт вазирига янги ўринбосар, Навоий вилояти ҳокимига биринчи ўринбосар тайинлангани ҳақида хабар берилганди.
Изоҳ (0)