10:45, 28.04.2021 9757

Туркияда жорий этиладиган локдаун хорижлик сайёҳларга тааллуқли бўлмайди

Туркияда 29 апрелдан 17 майгача жорий қилинадиган қатъий карантин чекловлари чет эллик сайёҳларга тааллуқли бўлмайди. Бу ҳақда мамлакат туризм вазири Нури Эрсойга таяниб, «Интерфакс» хабар берди.

Фото: «Дарё»

«Улар ўз паспортлари билан бемалол саёҳат қилиши, музейлар ва археологик ёдгорликларни томоша қилиши мумкин. Ҳозир Туркияда сайёҳ бўлиш — манфаатли», — деди туризм вазири.

Эрсой Safe Tourism Certification (Хавфсиз туризмни сертификатлаш) дастури ёзги мавсумда ҳам ўз ишини давом эттиришини ва хавфсизлик сертификатларини олиш мезонлари сайёҳлар билан ишлайдиган объектлар учун янада қатъийлашишини қўшимча қилди. Унинг таъкидлашича, ушбу соҳадаги барча ишчилар ҳозирда эмланмоқда ва уларни эмлаш май ойининг охирига қадар якунланади.

«Бу йил Туркияда туризм хизматлари хавфсизроқ бўлади ҳамда улар устидан назорат ўтган ёзга қараганда яхшироқ бўлади», — деди вазир.

У Туркиядаги чет эл элчихоналарининг маълумотларига кўра, мамлакатда дам олган чет эллик сайёҳлар орасида касалланиш даражаси жуда паст эканини таъкидлади. «Бу сертификатлаш ва кўрилган чоралар иш бераётганининг исботи», — деди Эрсой.

Туркия президенти Ражаб Тоййиб Эрдўғон мамлакатда коронавирус эпидемиясининг авж олиши муносабати билан 29 апрелдан 17 майгача тўлиқ локдаун жорий этилишини эълон қилган эди. Чекловлар 29 апрель, пайшанба куни соат 19:00 дан кучга киради ва 17 май, душанба куни соат 05:00 да тугайди.

Бунгача Туркия ҳукумати мамлакатда коронавирус тарқалишининг кучайиши фонида 23–25-​​апрель кунлари тўлиқ комендантлик соати ўрнатган эди.

Туркияда март ойининг охирида коронавирус қайта авж ола бошлади. Шундан сўнг мамлакат президенти Тоййиб Ражаб Эрдўғон 58 та шаҳарни COVID-19 юқтириш хавфи юқори бўлган қизил ҳудуд дея эълон қилди. Мазкур шаҳарларда Туркия аҳолисининг 80 фоизи истиқомат қилади.

Аввалроқ Россия 15 апрелдан 1 июнгача Туркияга доимий ва чартер рейсларни тўхтатиши ҳақида эълон қилганди. Шунингдек, Россия билан бир қаторда Хитой ва бошқа мамлакатлар ҳам Туркия билан парвозларни тўхтатишга қарор қилди.  Хитойнинг фуқаро авиацияси маъмурияти турк авиакомпанияларига 19 апрелдан бошлаб тўрт ҳафта давомида парвозларни тўхтатишга буйруқ берилганини эълон қилди.

Бошқа янгиликлар