Шовшувли журналистик суриштирувлари билан танилган россиялик сиёсатчи Алексей Навальнийнинг ижтимоий тармоқлардаги саҳифаларида унинг номидан янги пост эълон қилинди. Унда Навальний охирги йилларда ўзи мулоқот қилган барча тиббиёт ходимларига ташаккурини изҳор этган.
Навальнийнинг сўзларига кўра шахсий дунёқараши бўйича 2021 йил шубҳасиз шифокорлар йили бўлди. Сиёсатчи тиббиёт ходимлари унинг ҳаётини сақлаб қолгани, заҳарланган вақтида Германияга олиб кетилишини талаб қилишгани, кейинчалик ярим ўлик, яъни «сабзавот ҳолида ётган» Навальнийни қайтадан «одам қилгани», қамоққа тушганидан кейин эса унинг зарур муолажаларни олишини таъминлаш мақсадида алоҳида кампания ташкил қилишганини қайд этди.
Шунингдек, Навальний колонияда ўзига ғамхўрлик қилган барча тиббиёт ходимларига ҳам миннатдорлик билдирган.
«Қамоқхонадаги шифокорларга ҳам раҳмат. Мен уларнинг муассаса раҳбарияти белгилаган тартиб асосида, қамоқхона бошлиқлари эса Кремль белгилаб берган кўрсатмалар бўйича иш олиб борганини яхши тушунаман. Лекин ҳозир одамлар ҳақиқатда менга ёрдам қилишга уринмоқда. Кеча ҳамшира жўхори унидан тайёрланган уч қошиқ бўтқани бериш ёдидан кўтарилмаслиги учун ручка билан билагига белги қўяётганини кўрдим», – дейилган Навальнийнинг постида.
Навальний 31 мартдан 23 апрелга қадар мустақил шифокорларни ёнига киритишларини талаб қилган ҳолда очлик эълон қилди. Сиёсатчи оёғи ва белидаги оғриқлардан шикоят қилган ҳамда колонияда унга зарур тиббий хизмат кўрсатилмаётганини таъкидлаган. Россия президенти Владимир Путиннинг матбуот хизмати Навальнийнинг очлик эълон қилишига изоҳ беришдан бош тортган.
Навальний даволовчи шифокорлар тавсияси бўйича очликни бекор қилди. Тиббиёт ходимларининг сўзларига кўра сиёсатчи 20 апрелда Владимирдаги фуқаролик тиббиёт муассасасига олиб келинган ва мустақил тиббий кўрикка ўхшаб кетадиган текширувлардан ўтказилган.
21 апрелда Россияда «Навальнийга озодлик» номли норозилик намойишлари ўтказилди. Сиёсатчининг тарафдорлари Навальнийнинг шифокорлари унинг соғлиғи ёмонлашганини хабар қилганидан кейин мамлакатдаги одамларни кўчаларга чиқиб, норозилик намойишларини ўтказишга чорлади. Шифокорларнинг маълумотидан кейин Россия прокуратураси Навальнийга алоқадор ташкилотларни экстремистик гуруҳлар рўйхатига киритишни талаб қилган.
Инсон ҳуқуқлари бўйича ваколатли вакил Татяна Москалкёва фуқаролик тизимидаги шифокорларнинг 24 мартдан 20 апрелгача бўлган оралиқда доимий равишда Навальнийни текшириб турганини билдирган.
Изоҳ (0)