Turkiyada 29-apreldan 17-maygacha joriy qilinadigan qat’iy karantin cheklovlari chet ellik sayyohlarga taalluqli bo‘lmaydi. Bu haqda mamlakat turizm vaziri Nuri Ersoyga tayanib, “Interfaks” xabar berdi.
“Ular o‘z pasportlari bilan bemalol sayohat qilishi, muzeylar va arxeologik yodgorliklarni tomosha qilishi mumkin. Hozir Turkiyada sayyoh bo‘lish — manfaatli”, — dedi turizm vaziri.
Ersoy Safe Tourism Certification (Xavfsiz turizmni sertifikatlash) dasturi yozgi mavsumda ham o‘z ishini davom ettirishini va xavfsizlik sertifikatlarini olish mezonlari sayyohlar bilan ishlaydigan obyektlar uchun yanada qat’iylashishini qo‘shimcha qildi. Uning ta’kidlashicha, ushbu sohadagi barcha ishchilar hozirda emlanmoqda va ularni emlash may oyining oxiriga qadar yakunlanadi.
“Bu yil Turkiyada turizm xizmatlari xavfsizroq bo‘ladi hamda ular ustidan nazorat o‘tgan yozga qaraganda yaxshiroq bo‘ladi”, — dedi vazir.
U Turkiyadagi chet el elchixonalarining ma’lumotlariga ko‘ra, mamlakatda dam olgan chet ellik sayyohlar orasida kasallanish darajasi juda past ekanini ta’kidladi. “Bu sertifikatlash va ko‘rilgan choralar ish berayotganining isboti”, — dedi Ersoy.
Turkiya prezidenti Rajab Toyyib Erdo‘g‘on mamlakatda koronavirus epidemiyasining avj olishi munosabati bilan 29-apreldan 17-maygacha to‘liq lokdaun joriy etilishini e’lon qilgan edi. Cheklovlar 29-aprel, payshanba kuni soat 19:00 dan kuchga kiradi va 17-may, dushanba kuni soat 05:00 da tugaydi.
Bungacha Turkiya hukumati mamlakatda koronavirus tarqalishining kuchayishi fonida 23–25-aprel kunlari to‘liq komendantlik soati o‘rnatgan edi.
Avvalroq Rossiya 15-apreldan 1-iyungacha Turkiyaga doimiy va charter reyslarni to‘xtatishi haqida e’lon qilgandi. Shuningdek, Rossiya bilan bir qatorda Xitoy va boshqa mamlakatlar ham Turkiya bilan parvozlarni to‘xtatishga qaror qildi. Xitoyning fuqaro aviatsiyasi ma’muriyati turk aviakompaniyalariga 19-apreldan boshlab to‘rt hafta davomida parvozlarni to‘xtatishga buyruq berilganini e’lon qildi.
Izoh (0)