Тошкент шаҳри Яккасарой туманида радарга тош отаётган 3 нафар йигит қўлга олинди, дея хабар қилмоқда шаҳар ИИББ.
Фото: Тошкент шаҳар ИИББ
Қайд этилишича, 2021 йил 23 апрель куни Яккасарой тумани Кичик Бешёғоч ва Бобур кўчалари кесишмасида Тошкент шаҳар ИИББ ходимлари Spark автомобилида тезлик тартибини автоматлаштирилган тарзда қайд этувчи мослама ўрнатилган устун олдига келиб тўхтаган йигитларнинг радарга тош отаётганларини кўриб қолган.
Шундан сўнг мазкур фуқаролар автомобиллари билан Яккасарой тумани ИИО ФМБга етказилди. Ҳуқуқбузарлар 22 ёшли Ж.М. (юқоридаги автомобиль ҳайдовчиси), 23 ёшли Ш.М. ва 23 ёшли А.Ш. эканлиги аниқланди.
Суҳбат давомида аниқланишича, ҳодисадан бироз аввалроқ Ж.М. томонидан 2021 йил 17 апрель куни содир этилган қоидабузарлик сабабли автомобиль эгасига тезлик тартиби бузилгани учун 1 225 000 сўмлик жарима келгани маълум бўлди. Қилмиши учун тегишли масъулиятни бўйнига олмаган фуқаро ўртоқлари билан бирга радардан «аламини олишга» қарор қилган.
Мазкур факт асосида Маъмурий жавобгарлик тўғрисидаги кодекснинг 183-моддаси (майда безорилик) бўйича баённома расмийлаштирилди. Жазо тўғрисидаги ҳукм суд томонидан чиқарилади.
Бундан аввал Ўзбекистонда тадбиркорлар томонидан қоидабузарликларни аниқлаш учун камералар ўрнатиш тартиби белгилангани ҳамда Ўзбекистонда тадбиркорларнинг радар ўрнатишига рухсат бериладиган ҳудудларнинг аукцион нархлари эълон қилингани ҳақида хабар берилганди.
