«Auto.ru» сайтида 1979 йилда ишлаб чиқарилган «ГАЗ-24» сотувга қўйилгани тўғрисида эълон пайдо бўлди. Хусусий коллекциядан ўрин олган ва идеал ҳолатда сақланган автомобиль 2,8 миллион рублга (37 минг доллар) баҳоланмоқда. Таққослаш учун, бу пулга базавий жамланмадаги янги BMW Х2 (2,6 миллион рубль) харид қилиш мумкин, деб хабар беради Motor.
Эълон муаллифининг таъкидлашича, бу қайта тикланган автомобиль эмас ва унинг барча эҳтиёт қисмлари оригинал. Заводдан чиққанидан буён «Волга» 332 километр йўл босган. Машинанинг бу қадар қимматлиги шу орқали изоҳланмоқда.
Машина кузови идеал ҳолатда сақланган, хромланган деталлари ҳамда ғилдиракларидаги «колпак»лар кўзни қамаштиради. «Волга» капоти остидан 95 от кучини тақдим этишга қодир 2,5 литрли бензин двигатель ўрин олган бўлиб, у механик узатмалар қутиси ёрдамида бошқарилади.
Аввалроқ Германиядаги Autoscout24 онлайн майдончаси орқали 1983 йилда ишлаб чиқарилган «ГАЗ-24» 8,5 минг евро қийматида сотувга қўйилгани, Россияда саккиз йил давомида реставрация қилинган 55 йиллик «Волга» сотилаётгани тўғрисида хабар берилганди.
Изоҳ (0)