Toshkent shahri Yakkasaroy tumanida radarga tosh otayotgan 3 nafar yigit qo‘lga olindi, deya xabar qilmoqda shahar IIBB.
Qayd etilishicha, 2021-yil 23-aprel kuni Yakkasaroy tumani Kichik Beshyog‘och va Bobur ko‘chalari kesishmasida Toshkent shahar IIBB xodimlari Spark avtomobilida tezlik tartibini avtomatlashtirilgan tarzda qayd etuvchi moslama o‘rnatilgan ustun oldiga kelib to‘xtagan yigitlarning radarga tosh otayotganlarini ko‘rib qolgan.
Shundan so‘ng mazkur fuqarolar avtomobillari bilan Yakkasaroy tumani IIO FMBga yetkazildi. Huquqbuzarlar 22 yoshli J.M. (yuqoridagi avtomobil haydovchisi), 23 yoshli Sh.M. va 23 yoshli A.Sh. ekanligi aniqlandi.
Suhbat davomida aniqlanishicha, hodisadan biroz avvalroq J.M. tomonidan 2021-yil 17-aprel kuni sodir etilgan qoidabuzarlik sababli avtomobil egasiga tezlik tartibi buzilgani uchun 1 225 000 so‘mlik jarima kelgani ma’lum bo‘ldi. Qilmishi uchun tegishli mas’uliyatni bo‘yniga olmagan fuqaro o‘rtoqlari bilan birga radardan “alamini olishga” qaror qilgan.
Mazkur fakt asosida Ma’muriy javobgarlik to‘g‘risidagi kodeksning 183-moddasi (mayda bezorilik) bo‘yicha bayonnoma rasmiylashtirildi. Jazo to‘g‘risidagi hukm sud tomonidan chiqariladi.
Bundan avval O‘zbekistonda tadbirkorlar tomonidan qoidabuzarliklarni aniqlash uchun kameralar o‘rnatish tartibi belgilangani hamda O‘zbekistonda tadbirkorlarning radar o‘rnatishiga ruxsat beriladigan hududlarning auksion narxlari e’lon qilingani haqida xabar berilgandi.
Izoh (0)