Дунёдаги энг гавжум аэропортларнинг номи маълум қилинди

Аэропортлар халқаро кенгаши (ACI) 2020 йил якунларига кўра энг гавжум аэропортлар номини маълум қилди, деб ёзмоқда Tengritravel.

Статистикага кўра, рўйхатда охирги 22 йил давомида АҚШнинг Атланта штатидаги Хартсфилд-Жексон аэропорти етакчилик қилган эди. Лекин 2020 йилда унинг ўрнини 11 поғона кўтарилиб Хитойнинг Гуанжоу Байюнь аэропорти эгаллади.

2020 йил давомида Гуанжоу аэропорти 43,8 миллион йўловчига хизмат кўрсатган. Атланта аэропортида эса бу кўрсаткич 42,9 миллионни ташкил қилган, бу 2019 йилга таққослаганда 61 фоизга камроқ ҳисобланади.

2020 йил якунларига кўра, дунёнинг энг гавжум аэропортлари ўнталиги:

Гуанжоу, Хитой — 43,8 миллион йўловчи;Атланта, АҚШ — 42,9 миллион йўловчи;Чэнду, Хитой — 40,7 миллион йўловчи;Даллас / Форт-Уэрт, АҚШ — 39,3 миллион йўловчи;Шэньчжэнь, Хитой — 37,9 миллион йўловчи;Денвер, АҚШ — 33,7 миллион йўловчи;Куньмин, Хитой — 33 миллион йўловчи;Шанхай, Хитой — 31,2 миллион йўловчи;Сиань, Хитой — 31,1 миллион йўловчи.

Умумий ҳисобда, 2020 йилда дунё аэропортларидаги йўловчи ташиш ҳажми 64,6 фоизга камайган.

ACI бош директори Луис Фелипе де Оливейранинг сўзларига кўра, статистика аэропортларнинг қандай муаммога дуч келганини кўрсатиб берди.

«Яхшилашнинг баъзи ижобий белгилари билан, айниқса, эмлаш даражаси юқори бўлган мамлакатларда барқарор глобал тикланишга фақатгина кучайтирилган вакцинация кампаниялари, рақамли тиббий карталарни ишлаб чиқишни ривожлантиришда давом этиш ҳамда ҳукуматлар томонидан мувофиқлаштирилган ва изчил сиёсий кўмак ёрдамида эришилади», — деди Оливейра.

Таъкидланишича, пандемия шароитида юк ташувчи авиақатновлар унчалик катта зарар кўрмаган, уларнинг ҳажми, тахминан, саккиз фоизга камайган.

Аввалроқ Ҳаво транспорти халқаро ассоциацияси (IATA) йўловчи авиаташувлари саноати 2021 йилда 47,7 миллиард доллар миқдорида зарар кўришини прогноз қилди. Бу кўрсаткич IATA’нинг 2020 йил ноябрь ойидаги ҳисоботида кўрсатилганидан (38 миллиард доллар) кўра баландроқ ҳисобланади, лекин ўшанда ташкилот 2021 йилнинг иккинчи чорагидан бошлаб саноатнинг янада фаол тикланишини кутган эди.

Шунингдек, Bloomberg рейтингига кўра, Лондоннинг Хитроу аэропорти COVID-19 пандемияси туфайли Европадаги энг гавжум аэропортлар рейтингидаги биринчиликни қўлдан бой берди. Хитроу 2020 йил якунлари бўйича учинчи ўринга тушиб қолди. Унинг ўрнини Истанбулдаги 2018 йилда очилган янги халқаро аэропорт, иккинчи ўринни эса Париждаги Руасси—Шарль-де-Голль аэропорти эгаллади.