Чернобил АЭСдаги авариядан сўнг ҳодисанинг сабаби сифатида террорчилик ҳужуми версияси жиддий кўриб чиқилган. Бу ҳақда Федерал хавфсизлик хизмати(ФХХ)нинг истеъфодаги ходими, генерал майор, ўз вақтида СССР давлат қўмита хавфсизлиги (ДҚХ) операцион гуруҳининг Чернобил зонаси қўшинлари бошлиғи лавозимида ишлаган Анатолий Ткачук айтиб берди, деб ёзади «РБК» .
Ткачук авариянинг барча версиялари синчковлик билан текширилганини таъкидлади. Хусусан, унинг айтишича, АЭСни қуриш пайтида кўплаб қонунбузарликларга йўл қўйилгани тўғрисида ҳам далиллар топилган.
«Бу версия ҳалокатни келтириб чиқарган ёки йўқлигига эмас, баъзи конструкцияларнинг қулашига сабаб сифатида кўрилади», — дейди истеъфодаги генерал майор.
У авария сабаби «тўртинчи энергия блоки ходимларининг хатти-ҳаракатлари, реакторни портлаши муқаррар бўлган ҳолатга келтирган инсон омили» дея хулоса қилинганини эслаган. Чернобил АЭСдаги интизомнинг бузилиши ҳали махфийлаштирилмаган ДҚХ ҳужжатларида айтиб ўтилган. ФХХ фахрийсининг сўзларига кўра, хорижий разведка идоралари ёлланган СССР фуқаролари ёрдамида воқеа тўғрисида маълумот олишга ҳаракат қилган, аммо бунга йўл қўйилмаган.
Чернобил АЭСдаги авария 1986 йил 26 апрелга ўтар кечаси содир бўлган. Атом электр станциясида тўртинчи энергия блокининг РБМК-1000 реактори портлаши туфайли юз берган авария оқибатлари ҳалокатли бўлди. Портлашнинг асосий сабаби тўртинчи энергия блоки ишчилари томонидан АЭСни ишлатиш қоидаларининг қўпол равишда бузилиши экани қайд этилди.
2020 йилнинг июнь ойида Украина Чернобил АЭСга оид ҳужжатларни махфийлаштирди. Яширилган маълумотлар «Чернобил ДҚХ ҳужжати» китобига киритилди. Китобга киритилган 229 та ҳужжат орасида портлаш йили бўлган 1986 йилда содир бўлган бахтсиз ҳодисалар ҳақида хабарлар, реактор портлаган 26 апрелга ўтар кечаси атом электр станциясидаги телефон суҳбатларининг стенограммаси, воқеа содир бўлгани тўғрисида биринчи хабар, тергов бошланиши ва саркофаг конструкцияси ҳақида маълумотлар мавжуд.
Изоҳ (0)