Aeroportlar xalqaro kengashi (ACI) 2020-yil yakunlariga ko‘ra eng gavjum aeroportlar nomini ma’lum qildi, deb yozmoqda Tengritravel.
Statistikaga ko‘ra, ro‘yxatda oxirgi 22 yil davomida AQShning Atlanta shtatidagi Xartsfild-Jekson aeroporti yetakchilik qilgan edi. Lekin 2020-yilda uning o‘rnini 11 pog‘ona ko‘tarilib Xitoyning Guanjou Bayyun aeroporti egalladi.
2020-yil davomida Guanjou aeroporti 43,8 million yo‘lovchiga xizmat ko‘rsatgan. Atlanta aeroportida esa bu ko‘rsatkich 42,9 millionni tashkil qilgan, bu 2019-yilga taqqoslaganda 61 foizga kamroq hisoblanadi.
2020-yil yakunlariga ko‘ra, dunyoning eng gavjum aeroportlari o‘ntaligi:
Guanjou, Xitoy — 43,8 million yo‘lovchi;Atlanta, AQSh — 42,9 million yo‘lovchi;Chendu, Xitoy — 40,7 million yo‘lovchi;Dallas / Fort-Uert, AQSh — 39,3 million yo‘lovchi;Shenchjen, Xitoy — 37,9 million yo‘lovchi;Denver, AQSh — 33,7 million yo‘lovchi;Kunmin, Xitoy — 33 million yo‘lovchi;Shanxay, Xitoy — 31,2 million yo‘lovchi;Sian, Xitoy — 31,1 million yo‘lovchi.
Umumiy hisobda, 2020-yilda dunyo aeroportlaridagi yo‘lovchi tashish hajmi 64,6 foizga kamaygan.
ACI bosh direktori Luis Felipe de Oliveyraning so‘zlariga ko‘ra, statistika aeroportlarning qanday muammoga duch kelganini ko‘rsatib berdi.
“Yaxshilashning ba’zi ijobiy belgilari bilan, ayniqsa, emlash darajasi yuqori bo‘lgan mamlakatlarda barqaror global tiklanishga faqatgina kuchaytirilgan vaksinatsiya kampaniyalari, raqamli tibbiy kartalarni ishlab chiqishni rivojlantirishda davom etish hamda hukumatlar tomonidan muvofiqlashtirilgan va izchil siyosiy ko‘mak yordamida erishiladi”, — dedi Oliveyra.
Ta’kidlanishicha, pandemiya sharoitida yuk tashuvchi aviaqatnovlar unchalik katta zarar ko‘rmagan, ularning hajmi, taxminan, sakkiz foizga kamaygan.
Avvalroq Havo transporti xalqaro assotsiatsiyasi (IATA) yo‘lovchi aviatashuvlari sanoati 2021-yilda 47,7 milliard dollar miqdorida zarar ko‘rishini prognoz qildi. Bu ko‘rsatkich IATA’ning 2020-yil noyabr oyidagi hisobotida ko‘rsatilganidan (38 milliard dollar) ko‘ra balandroq hisoblanadi, lekin o‘shanda tashkilot 2021-yilning ikkinchi choragidan boshlab sanoatning yanada faol tiklanishini kutgan edi.
Shuningdek, Bloomberg reytingiga ko‘ra, Londonning Xitrou aeroporti COVID-19 pandemiyasi tufayli Yevropadagi eng gavjum aeroportlar reytingidagi birinchilikni qo‘ldan boy berdi. Xitrou 2020-yil yakunlari bo‘yicha uchinchi o‘ringa tushib qoldi. Uning o‘rnini Istanbuldagi 2018-yilda ochilgan yangi xalqaro aeroport, ikkinchi o‘rinni esa Parijdagi Ruassi—Sharl-de-Goll aeroporti egalladi.
Izoh (0)