Londonning Xitrou aeroporti COVID-19 pandemiyasi tufayli Yevropadagi eng gavjum aeroportlar reytingidagi birinchilikni qo‘ldan boy berdi, deya yozmoqda “RBK”.

Foto: Aviasales

Xitrou 2020-yil yakunlari bo‘yicha uchinchi o‘ringa tushib qoldi. Uning o‘rnini Istanbuldagi 2018-yilda ochilgan yangi xalqaro aeroport, ikkinchi o‘rinni esa Parijdagi Ruassi—Sharl-de-Goll aeroporti egalladi.

Reytingning Xitroudan keyingi to‘rtinchi pog‘onasidan Amsterdamdagi Sxipxol aeroporti, beshinchi pog‘onasidan Moskvaning Sheremetyevo aeroporti joy oldi.

Ma’lumotlarga ko‘ra, Xitrouning yo‘lovchi tashish hajmi 2020-yil mobaynida 73 foizga kamaydi. 2019-yilda mazkur aeroport xizmatidan deyarli 81 million kishi foydalangan bo‘lsa, o‘tgan yilda bu ko‘rsatkich atigi 22,1 million kishini tashkil qildi.

Bunga Buyuk Britaniyada koronavirusning yanada yuqumli shtammi paydo bo‘lishi alohida salbiy omil bo‘lib xizmat qildi. Yangi shtamm Britaniya ma’muriyatini karantin siyosatini kuchaytirib, boshqa davlatlarni Londonga parvozini cheklash yoki butunlay taqiqlashga undadi.

G‘arbiy Yevropaning aksariyat aeroportlari, shu jumladan, Frankfurt va Barselonadagi yirik aeroportlarda yo‘lovchi tashish hajmi 70 foizdan ko‘proqqa kamaygan bo‘lsa-da, Istanbuldagi ikkita eng yirik aeroport va Moskvaning Sheremetyevo aeroportida yo‘lovchi oqimining kamayishi ancha past bo‘ldi. Natijada ularning reytingi yaxshilandi.

Bloomberg ma’lumotlariga ko‘ra, yangi Istanbul aeroporti ilk to‘liq kalendar yilida 23,4 million sayohatchini jalb qilgan. Natijada o‘tgan yilning Yevropadagi eng gavjum aeroportiga aylandi. Sheremetyevo aeroportidan 2020-yilda 19,8 million kishi foydalangan (2018-yilda — 49,9 million).