Dunyo aviakompaniyalari 2021-yilda qariyb 48 mlrd dollar zarar ko‘rishi kutilmoqda

Yo‘lovchi aviatashuvlari sanoati 2021-yilda 47,7 milliard dollar miqdorida zarar ko‘radi, deb prognoz qildi Havo transporti xalqaro assotsiatsiyasi (IATA) o‘z hisobotida. Bu haqda “Kommersant” xabar berdi.

Bu ko‘rsatkich IATA’ning 2020-yil noyabr oyidagi hisobotida ko‘rsatilganidan (38 milliard dollar) ko‘ra balandroq hisoblanadi, lekin o‘shanda tashkilot 2021-yilning ikkinchi choragidan boshlab sanoatning yanada faol tiklanishini kutgan edi.

Tashkilotning qayd etishicha, 2020-yilgi 126,4 milliard dollar miqdoridagi yo‘qotishlarga taqqoslaganda, bu yil ko‘rilgan zarar sohadagi yaxshilanishga ishora bermoqda. Eng katta yo‘qotishlar Yevropa aviakompaniyalarida (22,2 milliard dolar), shuningdek, Osiyo-Tinch okeani mintaqalarining aviatashuvchilarida (10,5 milliard dollar) bo‘lishi kutilmoqda.

IATA hisob-kitoblariga ko‘ra, umumiy hisobda, 2021-yilda yo‘lovchi tashish hajmi 2019-yildagi ko‘rsatkichning 43 foizigacha qayta tiklanib, tashilgan yo‘lovchilarning umumiy soni 2,4 milliardga yetishi mumkin. Bu 2020-yildagi yo‘lovchilar soniga (1,8 milliard kishi) qaraganda ko‘proq, lekin 2019-yil ko‘rsatkichlariga (4,5 milliard kishi) taqqoslaganda ancha kam hisoblanadi.

Ichki aviaqatnovlarning xalqaro parvozlarga qaraganda tezroq tiklanishi kutilmoqda. 2021-yilning ikkinchi yarmiga kelib 2019-yilgi ichki aviaqatnovlarning 96 foizi qayta tiklanishi mumkin. Global aviasanoatning yo‘lovchilardan va yuklardan keladigan daromadi 2021-yilda 458 milliard dollarga yetishi kutilmoqda, bu 2019-yildagi daromadning 55 foizini tashkil etsa, 2020-yilnikidan 23 foizga ko‘proq hisoblanadi.

Avvalroq koronavirus pandemiyasi tufayli Fransiya hukumati Braziliya bilan, Rossiya hukumati Turkiya bilan aviaqatnovlarni bekor qildi. Ushbu mamlakatlarda vaziyat barqarorlashsa, aviaqatnovlar qayta tiklanishi ma’lum qilindi.