Давлат солиқ қўмитаси томонидан қўшилган қиймат солиғини тўлашдан қочиш «схема»ларига қарши бошланган фаол ҳаракатларда қонунчилик талабларига қатъий риоя этилганлиги суд жараёнларида ўз тасдиғини топмоқда. Бу ҳақда ДСҚ матбуот хизмати хабар берди.
Хусусан, Фарғона, Бухоро, Сирдарё вилоятларида иқтисодий судларнинг ҳал қилув қарорига асосан 4 та ҳолатда давлат солиқ хизмати органларининг хатти-ҳаракатлари қонунийлиги исботланган.
Жумладан, «Муҳаммадрасул савдо барака» МЧЖнинг Фарғона вилоят солиқ органлари қарорини ғайриқонуний деб топиш ва 120,3 миллион сўмлик инкассо топшириқномасини ижро этишни бекор қилиш тўғрисидаги даъво аризаси Фарғона туманлараро иқтисодий судида кўриб чиқилиб, даъво талабини қаноатлантириш рад этилган. Шунингдек, солиқ органларининг ҚҚСни ҳисобга олишни бекор қилиш билан боғлиқ ҳаракатлари қонуний деб топилган.
Бундан ташқари, тадбиркорлик субъектлари томонидан маъмурий судларга киритилган 14 та шикоят аризаси бўйича иш юритиш келтирилган важларнинг асоссиз эканлиги сабабли тугатилган, 1 та ҳолатда кўрмасдан қолдирилган ва 1 та ҳолатда маъмурий суднинг ҳал қилув қарори билан шикоят аризасини қаноатлантириш рад этилган.
Жумладан, Давлат солиқ қўмитаси томонидан Наманган вилоятида рўйхатдан ўтган Namangan Export Company МЧЖ бюджетга ҳақиқатда тўланмаган 6,5 миллиард сўм қўшилган қиймат солиғини асоссиз ҳисобга олганлиги аниқланган.
Тадбиркорлик субъекти Наманган туманлараро маъмурий судига шикоят аризаси бериб, солиқ органларининг жамият ҳисоб-рақамига инкассо топшириқномасини қўйишда ифодаланган хатти-ҳаракатларини қонунга хилоф деб топишни сўраган. Мазкур иш юзасидан суд муҳокамаси 2021 йил 22 апрель куни якунланган ва суднинг ҳал қилув қарорига кўра, тадбиркорлик субъектининг шикоят аризасини қаноатлантириш рад этилган.
«Давлат солиқ хизмати органлари тадбиркорлик субъектлари фаолиятидаги барча масалалар қонуний ҳал этилишидан манфаатдордир ва бунинг учун ‘Солиқчи-кўмакчи’ тамойили асосида уларга амалий ёрдам кўрсатиб боради», — дейилади қўмита хабарида.
Эслатиб ўтамиз, Ўзбекистонда «нақдлаштирувчи корхоналар» билан курашиш бошланиб, 396 та корхонадан иборат шубҳали контрагентлар реестри тузилганди. Фаолияти шубҳали деб топилган корхоналар билан амалга оширилган битимларни ўрганиб чиқиш мақсадида тезкор равишда камерал солиқ текширувлари давом эттирилмоқда. 2 апрель ҳолатига кўра, 8752 та корхонада ҚҚСни ноқонуний ҳисобга олиш фактлари тасдиқланган.
Қўмита асоссиз ҳисобга олинган ҚҚС суммаси бўйича 1 майгача қайта ҳисобот ихтиёрий топширилган тақдирда, мазкур корхоналар мансабдор шахслари маъмурий ва жиноий жавобгарликка тортилмаслигини маълум қилганди.
Изоҳ (0)