Davlat soliq qo‘mitasi tomonidan qo‘shilgan qiymat solig‘ini to‘lashdan qochish “sxema”lariga qarshi boshlangan faol harakatlarda qonunchilik talablariga qat’iy rioya etilganligi sud jarayonlarida o‘z tasdig‘ini topmoqda. Bu haqda DSQ matbuot xizmati xabar berdi.
Xususan, Farg‘ona, Buxoro, Sirdaryo viloyatlarida iqtisodiy sudlarning hal qiluv qaroriga asosan 4 ta holatda davlat soliq xizmati organlarining xatti-harakatlari qonuniyligi isbotlangan.
Jumladan, “Muhammadrasul savdo baraka” MChJning Farg‘ona viloyat soliq organlari qarorini g‘ayriqonuniy deb topish va 120,3 million so‘mlik inkasso topshiriqnomasini ijro etishni bekor qilish to‘g‘risidagi da’vo arizasi Farg‘ona tumanlararo iqtisodiy sudida ko‘rib chiqilib, da’vo talabini qanoatlantirish rad etilgan. Shuningdek, soliq organlarining QQSni hisobga olishni bekor qilish bilan bog‘liq harakatlari qonuniy deb topilgan.
Bundan tashqari, tadbirkorlik subyektlari tomonidan ma’muriy sudlarga kiritilgan 14 ta shikoyat arizasi bo‘yicha ish yuritish keltirilgan vajlarning asossiz ekanligi sababli tugatilgan, 1 ta holatda ko‘rmasdan qoldirilgan va 1 ta holatda ma’muriy sudning hal qiluv qarori bilan shikoyat arizasini qanoatlantirish rad etilgan.
Jumladan, Davlat soliq qo‘mitasi tomonidan Namangan viloyatida ro‘yxatdan o‘tgan Namangan Export Company MChJ budjetga haqiqatda to‘lanmagan 6,5 milliard so‘m qo‘shilgan qiymat solig‘ini asossiz hisobga olganligi aniqlangan.
Tadbirkorlik subyekti Namangan tumanlararo ma’muriy sudiga shikoyat arizasi berib, soliq organlarining jamiyat hisob-raqamiga inkasso topshiriqnomasini qo‘yishda ifodalangan xatti-harakatlarini qonunga xilof deb topishni so‘ragan. Mazkur ish yuzasidan sud muhokamasi 2021-yil 22-aprel kuni yakunlangan va sudning hal qiluv qaroriga ko‘ra, tadbirkorlik subyektining shikoyat arizasini qanoatlantirish rad etilgan.
“Davlat soliq xizmati organlari tadbirkorlik subyektlari faoliyatidagi barcha masalalar qonuniy hal etilishidan manfaatdordir va buning uchun ‘Soliqchi-ko‘makchi’ tamoyili asosida ularga amaliy yordam ko‘rsatib boradi”, — deyiladi qo‘mita xabarida.
Eslatib o‘tamiz, O‘zbekistonda “naqdlashtiruvchi korxonalar” bilan kurashish boshlanib, 396 ta korxonadan iborat shubhali kontragentlar reyestri tuzilgandi. Faoliyati shubhali deb topilgan korxonalar bilan amalga oshirilgan bitimlarni o‘rganib chiqish maqsadida tezkor ravishda kameral soliq tekshiruvlari davom ettirilmoqda. 2-aprel holatiga ko‘ra, 8752 ta korxonada QQSni noqonuniy hisobga olish faktlari tasdiqlangan.
Qo‘mita asossiz hisobga olingan QQS summasi bo‘yicha 1-maygacha qayta hisobot ixtiyoriy topshirilgan taqdirda, mazkur korxonalar mansabdor shaxslari ma’muriy va jinoiy javobgarlikka tortilmasligini ma’lum qilgandi.
Izoh (0)