Ўзбекистонда 2020 йилда прокурорлар ташаббуси билан 57 нафар шахсга оқлов ҳукмлари чиқарилгани айтилди

Ўзбекистон Бош прокурори Ниғматилла Йўлдошев Олий Мажлис Сенатининг ўн тўртинчи ялпи мажлисидаги ҳисоботида прокурорларнинг судлардаги иштироки масаласига тўхталиб ўтган.

Фаолиятимизнинг яна бир муҳим йўналиши бу прокурорларимизнинг судлардаги иштироки билан боғлиқ. Ҳисобот йилида 119 мингта иш кўрилишида прокурор иштироки таъминланди, судларнинг 3 мингдан ортиқ ноқонуний қарорлари прокурорлар протестлари асосида қонунларга мослаштирилди. Бу жами ўзгартирилган ва бекор қилинган суд қарорларининг 31 фоизини ташкил этади. Прокурорлар ташаббуси билан 57 нафар шахсга оқлов ҳукмлари чиқарилди.

Ниғматилла Йўлдошев, бош прокурор

Аввалроқ АОКАда ўтказилган брифингда Бош прокуратура матбуот котиби Ҳаёт Шамсутдинов ҳам 2020 йилда бевосита прокуратура органлари томонидан 10 372 та жиноят иши юзасидан тергов ўтказилиб, 6100 нафар шахсга нисбатан 3903 та жиноят иши судларга юборилгани, жиноят оқибатида етказилган 622,2 миллиард сўмлик зарар айбланувчилардан ундирилгани, прокурорлар ташаббуси билан 57 нафар шахс оқланганини айтган эди. Президент Шавкат Мирзиёев 2020 йилнинг 29 декабрь куни Олий Мажлисга йўллаган Мурожаатномасида эса судлар мустақиллиги таъминланиши натижасида 2020 йилнинг ўзида 719 нафар фуқарога нисбатан оқлов ҳукми чиқарилганини маълум қилган. Бош прокурор ўринбосари Эркин Йўлдошев ўтган уч йил давомида судлар томонидан 1910 та оқлов ҳукми чиқарилган бўлса, шундан 566 таси прокурорларнинг протестлари билан бўлганини қайд этган.Эслатиб ўтамиз, Фарғонада 2020 йилда судлар томонидан 33 нафар шахс оқлангани, 2020 йил Ўзбекистонда жиноят ишлари бўйича судлар томонидан 38 149 нафар шахсга нисбатан 30 284 та иш кўриб чиқилгани, ўтган бир йил давомида 781 нафар шахс оқланган ва реабилитация қилинган, судланган шахслар сони 27 999 нафарни ташкил этиб, шундан 7110 нафар шахсга озодликдан маҳрум қилиш ва 19 838 нафарига бошқа турдаги жазолар тайинланган, 1051 нафар шахсга шартли ҳукм ўқилгани ҳақида ҳам хабарлар берилган.