O‘zbekistonda 2020-yilda prokurorlar tashabbusi bilan 57 nafar shaxsga oqlov hukmlari chiqarilgani aytildi

O‘zbekiston Bosh prokurori Nig‘matilla Yo‘ldoshev Oliy Majlis Senatining o‘n to‘rtinchi yalpi majlisidagi hisobotida prokurorlarning sudlardagi ishtiroki masalasiga to‘xtalib o‘tgan.

Faoliyatimizning yana bir muhim yo‘nalishi bu prokurorlarimizning sudlardagi ishtiroki bilan bog‘liq. Hisobot yilida 119 mingta ish ko‘rilishida prokuror ishtiroki ta’minlandi, sudlarning 3 mingdan ortiq noqonuniy qarorlari prokurorlar protestlari asosida qonunlarga moslashtirildi. Bu jami o‘zgartirilgan va bekor qilingan sud qarorlarining 31 foizini tashkil etadi. Prokurorlar tashabbusi bilan 57 nafar shaxsga oqlov hukmlari chiqarildi.

Nig‘matilla Yo‘ldoshev, bosh prokuror

Avvalroq AOKAda o‘tkazilgan brifingda Bosh prokuratura matbuot kotibi Hayot Shamsutdinov ham 2020-yilda bevosita prokuratura organlari tomonidan 10 372 ta jinoyat ishi yuzasidan tergov o‘tkazilib, 6100 nafar shaxsga nisbatan 3903 ta jinoyat ishi sudlarga yuborilgani, jinoyat oqibatida yetkazilgan 622,2 milliard so‘mlik zarar ayblanuvchilardan undirilgani, prokurorlar tashabbusi bilan 57 nafar shaxs oqlanganini aytgan edi. Prezident Shavkat Mirziyoyev 2020-yilning 29-dekabr kuni Oliy Majlisga yo‘llagan Murojaatnomasida esa sudlar mustaqilligi ta’minlanishi natijasida 2020-yilning o‘zida 719 nafar fuqaroga nisbatan oqlov hukmi chiqarilganini ma’lum qilgan. Bosh prokuror o‘rinbosari Erkin Yo‘ldoshev o‘tgan uch yil davomida sudlar tomonidan 1910 ta oqlov hukmi chiqarilgan bo‘lsa, shundan 566 tasi prokurorlarning protestlari bilan bo‘lganini qayd etgan.Eslatib o‘tamiz, Farg‘onada 2020-yilda sudlar tomonidan 33 nafar shaxs oqlangani, 2020-yil O‘zbekistonda jinoyat ishlari bo‘yicha sudlar tomonidan 38 149 nafar shaxsga nisbatan 30 284 ta ish ko‘rib chiqilgani, o‘tgan bir yil davomida 781 nafar shaxs oqlangan va reabilitatsiya qilingan, sudlangan shaxslar soni 27 999 nafarni tashkil etib, shundan 7110 nafar shaxsga ozodlikdan mahrum qilish va 19 838 nafariga boshqa turdagi jazolar tayinlangan, 1051 nafar shaxsga shartli hukm o‘qilgani haqida ham xabarlar berilgan.