Украина президенти Владимир Зеленский россиялик ҳамкасби Владимир Путиннинг музокаралар учун Москвага келиш таклифини қабул қилмайди. Бу ҳақда Украина бош вазирининг ўринбосари, вақтинча босиб олинган ҳудудлар масалалари вазири Алексей Резников маълум қилди, деб ёзмоқда «РБК».
Сиёсатчининг сўзларига кўра, Зеленский Россия билан биринчи навбатда Донбассдаги ҳарбий ҳаракатларни тўхтатиш ва Россия ҳарбийларини у ердан олиб чиқиш, фақат шундан кейингина ўзаро муносабатларнинг тикланиши ҳақида гаплашади. Аммо Резников бу учрашув Москвада бўлиб ўтмаслигини маълум қилди.
«Уруш пайтида президент пойтахтга бориб, тажовузкор мамлакат вакили бўлган одам билан учраша олмайди. Менимча, бу бироз ғалати таклиф», — деди вазир ўринбосари. Резниковнинг фикрига кўра, бундай учрашув тўрт мамлакат етакчилари иштирокидаги (Украина, Россия, Франция, Германия) «нормандча формат» доирасида ўтказилиши керак.
20 апрель куни Зеленский Путинга Украинанинг Донбассидаги уруш кетаётган исталган жойида учрашишни таклиф қилди. Путин бунга жавобан, агар Украина президенти Донбасс муаммосини муҳокама қилмоқчи бўлса, аввал у Донецк ва Луганск Халқ Республикаларининг раҳбарлари билан учрашиши кераклигини ва шундан кейингина учинчи томон сифатида Россия раҳбарияти билан учрашиши мумкинлигини айтди. Шунингдек, у Россия томонининг Украина билан икки мамлакат ўртасидаги муносабатлар ҳақида гаплашишга тайёрлигини айтди ва Зеленскийни «ўзига қулай бўлган исталган вақтда» Москвага келишга таклиф қилди.
Зеленскийнинг идораси Украина президентининг ушбу таклифга жавоб қайтаришига ваъда берди. «Мухолифатчи платформа — Ҳаёт учун» партиясининг Олий рададаги депутати, Украина бош прокурорининг ўринбосари ва Украина Миллий хавфсизлик ва мудофаа кенгаши котиби Ренат Кузмин Владимир Зеленскийга таклифни қабул қилишни маслаҳат берди ва шундагина давлат раҳбари Донбассда тинчлик ўрнатиш, иқтисодиётни тиклаш ва «мамлакатга қонун ва тартибни қайтариш» имкониятига эга бўлишини айтди.
22 апрель куни Донецк Халқ Республикаси (ДХР) раҳбари Денис Пушилин ва Луганск Халқ Республикаси (ЛХР) раҳбари Леонид Пасечник Донбасснинг исталган нуқтасида Зеленский билан «самимий ва очиқ суҳбат учун» учрашишга тайёрлигини эълон қилди. Лекин Украина президенти идораси раҳбарининг маслаҳатчиси Алексей Арестович «ДХР ва ЛХР билан ҳеч қандай музокаралар бўлмайди ва бўлиши ҳам мумкин эмас» деб айтди.
Маълумот учун, Байден ва Ангела Меркель Россияни Украина билан чегарадаги қўшинларини олиб кетишга чақирди. Украина президенти Владимир Зеленский Россияни «жиловлаш»да Байдендан ёрдам сўради. Кремль эса Россия ва Украина ўртасидаги уруш эҳтимолини истисно қилди.
Изоҳ (0)