Ҳиндистонда кетма-кет иккинчи кун давомида COVID-19 билан кунлик касалланиш сони бўйича дунё рекорди қайд этилди. Бу ҳақда Ҳиндистон Соғлиқни сақлаш вазирлиги маълумотларига асосланиб, «РБК» хабар берди.
Сўнгги бир кеча-кундузда мамлакатда 332,73 минг янги инфекцияланиш ҳолати аниқланди. Бир кун олдин, 22 апрель куни, Ҳиндистон бир суткада коронавирус юқтирганларнинг кўплиги бўйича дунё рекордини янгилаган эди — 314,8 минг. Бунгача ушбу рекорд АҚШ томонидан январь ойида ўрнатилган бўлиб, ўшанда касалланганларнинг кунлик ўсиши 297,4 минг кишига етган эди.
Ўтган кун давомида Ҳиндистон COVID-19’дан кунлик ўлимларнинг кўплиги бўйича ҳам рекорд ўрнатди. Соғлиқни сақлаш вазирлигининг маълумотларига кўра, мамлакатда инфекция оқибатида 2263 киши вафот этган. Касаллик қурбонларининг умумий сони 186,92 минг кишига етган.
Пандемия даврида Ҳиндистонда коронавирусга чалинганлар сони 16 миллиондан ошди, шулардан 13,6 миллиони соғайди.
Sky News хабарига кўра, сўнгги ҳафталарда ҳукумат маҳаллий сайловлар олдидан бир қатор оммавий митингларни ўтказган ва Ганга дарёси бўйидаги муқаддас Хардвар шаҳрида Кумбха Мела фестивалини ўтказишга рухсат берган. Фестиваль давомида зиёратчилар дарё бўйида руҳ ва танани поклашни англатувчи оммавий ҳаммом ташкил қилади.
Жонс Ҳопкинс университети маълумотларига кўра, Ҳиндистон COVID-19 юқтирганлар сони кўплиги бўйича дунёда иккинчи ўринда — 16,2 миллион киши. АҚШ эса 31,9 миллион киши билан етакчилик қилмоқда. Ўлим даражаси бўйича Ҳиндистон тўртинчи ўринда — 186,92 минг киши. Касаллик оқибатида энг кўп ўлим қайд этилган уч етакчи давлатлар: АҚШ —570 321 киши, Бразилия — 383 502 ва Мексика —214 079 киши.
Мавзуга доир:
Изоҳ (0)