Латвия россиялик дипломатни мамлакатдан чиқариб юбормоқда. Бу ҳақда республика Ташқи ишлар вазирлиги раҳбари Эдгарс Ринкевичсга таяниб «ТАСС» хабар берди.
«Чехиялик иттифоқчиларимиз билан бирдамлик белгиси сифатида ва Венадаги конвенция бузилгани сабабли Латвия россиялик дипломатни мамлакатдан чиқариб юборишга қарор қилди. Латвия ўз ҳудудидаги, шунингдек, шериклари ва иттифоқчилари ҳудудидаги бузғунчиликка жим қараб турмайди», — деб ёзган вазир Twitter’да.
Латвия Ташқи ишлар вазирлигининг хабар беришича, тегишли қарор тўғрисида 23 апрель, жума куни Россиянинг республикадаги муваққат ишлар вакили Вадим Васильевга хабар берилган.
«Латвия ўзаро ҳурмат, халқаро ҳуқуқ ва дипломатик муносабатлар тўғрисидаги Вена конвенцияси тамойилларига таянган ҳолда Россия билан муносабатларни шакллантиришдан манфаатдор. Россиянинг хатти-ҳаракатлари азалдан ушбу тамойилларнинг мунтазам равишда бузилиши ва хавфсизлик ҳолати ёмонлашувининг далили бўлиб келган», — дейилади Ташқи ишлар вазирлиги хабарида.
Латвия ташқи ишлар вазирлиги, шунингдек, бундай қарор «Россия элчихонаси дипломатининг ҳаракатлари ва унинг Латвияда содир этган қонунбузарликларини баҳолаш асосида» қабул қилинганини айтиб ўтди. «Қарор, шунингдек, Европа Иттифоқи ва НАТО доирасидаги иттифоқчилар билан ўзаро маслаҳатлашувлар ва Латвиянинг масъул муассасалари томонидан тақдим этилган маълумотлар асосида қабул қилинди», — деб таъкидлади вазирлик.
Латвия телевидениеси 23 апрель куни ўз манбаларига асосланиб хабар беришича, Ташқи ишлар вазирлиги республикадаги Россия элчихонасининг ҳарбий атташесини персона нон-грата деб эълон қилди. Апрель ойи ўрталарида Латвия Ташқи ишлар вазирлиги пандемия билан боғлиқ равишда эпидемиологик хавфсизлик қоидаларини бузгани муносабати билан Россия томонига норозилик билдирган. Россиянинг Латвиядаги элчихонасидан тезкор изоҳ олишнинг иложи бўлмаган эди.
Латвия билан бир қаторда Литва ҳукумати ҳам икки россиялик дипломатни мамлакатдан чиқариб юборишга қарор қилди. Бу ҳақда республика Ташқи ишлар вазирлиги раҳбари Габриэлюс Ландсбергис маълум қилган. «Россия элчихонаси вакили Ташқи ишлар вазирлигига чақирилди ва унга дипломатик мақомга мос келмайдиган фаолият билан боғлиқ ҳолда элчихонанинг икки ходимини Литвада номақбул деб эълон қилиш тўғрисида нота топширилди», — дейилади вазирнинг хабарида. Уларга етти кун ичида Литва ҳудудидан чиқиб кетиш ҳақида кўрсатма берилган.
Литванинг Москвадаги элчихонаси Чехияга дипломатик функцияларни бажаришда ёрдам беришга тайёрлигини билдирди, бу эса Чехия элчихонаси ходимларини Россиядан чиқариб юборилиши билан мураккаблашади.
Шунингдек, Эстония Ташқи ишлар вазирлиги мамлакатдаги россиялик дипломат қайтариб юборилаётганини маълум қилди. «Чехия билан бирдамлик белгиси сифатида Эстония Вена конвенциясида келишилган дипломатик фаолиятга номувофиқ иш олиб бораётган россиялик дипломатни мамлакатдан чиқариб юборади», — дейилади баёнотда.
Вазирликнинг қўшимча қилишича, 23 апрель куни Эстония ташқи ишлар вазирлиги Чехиядаги Врбетица қишлоғида содир бўлган воқеа тафсилотлари тўғрисида Чехиядан олинган маълумотлар билан боғлиқ ҳолда «Россиянинг Эстониядаги элчиси Александр Петровни ҳукуматга чақирган».
Россия—Чехия муносабатларининг кескинлашуви 17 апрель куни Чехия ҳукумати республика шарқидаги Врбетица қишлоғидаги ўқ-дорилар омборларида 2014 йилда содир бўлган портлашлар воқеасининг янги ҳолатларига аниқлик киритиш тўғрисида баёнот берганидан кейин бошланди. Чехия томонининг сўзларига кўра, ушбу воқеада Россия махсус хизматлари иштирок этган. The Insider ва Bellingcat агентликлари томонидан ўтказилган суриштирувга кўра, портлашлар операциясига Россия разведка бошқармасининг 29155-сонли ҳарбий қисм бошлиғи, генерал Андрей Аверьянов шахсан раҳбарлик қилган. 17 апрель куни Прага Россия элчихонасининг 18 нафар ходимини чиқариб юборишни эълон қилди. Шунингдек, Чехия Сенати ҳукуматни Россия билан дўстлик шартномасини бекор қилишга ва Прагада фақат бир нафар россиялик дипломатни қолдиришга чақирди. Аввалроқ Депутатлар палатаси (Чехия парламентининг қуйи палатаси) ҳам Чехия ҳукуматини шундай чоралар кўришга чақирган эди.
Россия айбловларни бемаъни ва асоссиз деб атади ва Чехиянинг хатти-ҳаракатларига жавоб сифатида 20 нафар чехиялик дипломатни мамлакатдан чиқариб юборди.
Изоҳ (0)