Россиялик спортчилар кейинги Олимпия ўйинларида давлат мадҳияси ўрнига Пётр Чайковскийнинг 1-рақамли фортепиано концертидан парча ишлатади. Россия томонидан таклиф қилинган ушбу вариант Халқаро олимпия қўмитаси (ХОҚ) томонидан маъқулланди, деб ёзади Meduza.
Ушбу қарор 2021 йил Токиода бўлиб ўтадиган ёзги Олимпия ўйинлари ва 2022 йил бошларига режалаштирилган Пекин қишки Олимпия ўйинларига тааллуқлидир.
«Бугундан бошлаб бизнинг Олимпия терма жамоамиз ўзига хосликнинг барча элементларига эга. Бизда уч хил рангдан иборат Россия Олимпия қўмитасининг байроғи, ҳамюртларимиз учун ҳам, бошқа мамлакат мухлислари учун ҳам ҳеч қандай ёзувсиз осонликча таниладиган расмий кийим, энди эса Токио ва Пекинда россиялик Олимпиячилар шарафига куйланадига мусиқа бор», — дея қарорга изоҳ берди Россия Олимпия қўмитаси раҳбари Станислав Поздняков.
Маълумот учун, Олимпия ўйинларида Россиянинг давлат байроғи ва мадҳиясидан 2022 йил 16 декабргача фойдаланиш тақиқланган. Москва антидопинг лабораторияси маълумотларида фирибгарликка йўл қўйилгани туфайли Спорт арбитраж суди шундай қарорга келган эди.
Чайковскийнинг 1-рақамли концертидан бир парча россиялик спортчилар томонидан аллақачон бир неча жаҳон чемпионатларида мадҳия ўрнига ишлатилган.
Россия мадҳияни «Катюша»қўшиғи билан алмаштирмоқчи эди, аммо ушбу ватанпарварлик қўшиғи Россия билан бевосита боғлиқ бўлгани учун Спорт арбитраж суди ундан фойдаланиб бўлмаслигини айтди.
Изоҳ (0)