Россия мудофаа вазири Сергей Шойгу мамлакат жанубидаги ҳарбий машғулотларда иштирок этаётган қўшинларни 1 майгача доимий жойлаштирилган пунктларга қайтаришни буюрди. Бу ҳақда Мудофаа вазирлигига таяниб, «РБК» хабар берди.
«Мен кутилмаган текширувдан кўзланган мақсадларга тўлиқ эришилди, деб ўйлайман. Қўшинлар мамлакатнинг ишончли мудофаасини таъминлаш қобилиятини намойиш этди. Шу муносабат билан мен Жанубий ва Ғарбий ҳарбий округлардаги текширувни якунлаш тўғрисида қарор қабул қилдим», — деди вазир Қримдаги йиғилишда.
«2021 йил 1 майга қадар Жанубий ҳарбий округнинг 58-армияси, Марказий ҳарбий округнинг 41-армияси, 7- ва 76-ҳаво ҳужуми ва 98-ҳаво-десант дивизиялари шахсий таркибини доимий жойлашиш пунктларига қайтаринг», — буюрди Шойгу.
Хабарга кўра, 23 апрелда қўшинлар жанубий чегаралардан қайтишни бошлайди.
Украина президенти Владимир Зеленский Россия қўшинлари олиб чиқиб кетилгандан кейин чегарада кескинлик пасайишини айтди.
«Украина чегарасида қўшинлар сонининг камайиши кескинликни мутаносиб равишда пасайтиради», — деб ёзди Зеленский Twitter’да.
«Украина ҳар доим ҳушёр ҳолатда, аммо Донбассдаги ҳарбий кучларни камайтириш ва вазиятни кескинлаштириш бўйича ҳар қандай қадамларни маъқуллайди. Украина тинчликни истайди. Ёрдам учун халқаро шерикларга миннатдорлик билдираман», — дея қўшимча қилди у.
22 апрель куни Қримдаги Опук полигонида Шойгу бошчилигида Жанубий ҳарбий округ кучлари ва ҳаво-десант кучлари машғулотларининг асосий босқичи бўлиб ўтди. Машғулотларда 10 мингдан ортиқ аскар, 1200 та қурол ва ҳарбий техника, шунингдек, 40 дан ортиқ ҳарбий кема иштирок этди.
Wall Street Journal (WSJ) газетаси Россиянинг Қрим ва Воронеж вилоятидаги ҳарбий техникаларининг сунъий йўлдошдан олинган суратларини чоп этди.
Эслатиб ўтамиз, март ойининг охирида бутун дунё Донбассдаги вазиятнинг жиддийлашаётгани ҳақида гапира бошлади. Conflict Intelligence Team суриштирув гуруҳи Россия қўшинларининг Россия—Украина чегараси ҳудудида тўпланишини 2014—2015 йиллардан бери энг кескин кўрсаткич деб атади. Киев ўз чегаралари яқинида рус қўшинлари тўпланганини тасдиқлади ва уни «ўз кучини кўз-кўз қилиш» деб атади. АҚШ Россиядан мазкур «провокациялар»га изоҳ беришни талаб қилди.
Аввалроқ Франция президенти Эммануэль Макрон, Германия канцлери Ангела Меркель ва Украина президенти Владимир Зеленский Донбассдаги можаронинг авж олишига йўл қўймаслик учун Россия ўз қўшинларини Украина билан чегарадан олиб кетиши кераклигини айтганди.
Шунингдек, Байден ва Ангела Меркель Россияни Украина билан чегарадаги қўшинларини олиб кетишга чақирган эди. Унгача Россия Украина чегарасига ва Қримга 40 минг нафардан аскар жўнатгани ҳақида хабар берилган. Украина президенти Владимир Зеленский Россияни «жиловлаш»да Байдендан ёрдам сўраган. Кремль эса Россия ва Украина ўртасидаги уруш эҳтимолини истисно қилган.
Изоҳ (0)