Путин Зеленскийга истаган вақтида Москвада учрашишни таклиф қилди

Агар Украина президенти Владимир Зеленский Донбасс муаммосини муҳокама қилмоқчи бўлса, аввал ўзини республика деб эълон қилган Донецк ва Луганск Халқ Республикалари (ДХР ва ЛХР) раҳбарлари билан, шундан кейингина Россия раҳбарияти билан учрашиши керак. Бу ҳақда президент Владимир Путин таъкидлаб ўтди, деб ёзади «РБК».

«Агар гап икки томонлама муносабатларни ривожлантириш ҳақида бўлса, унда марҳамат. Биз Украина президентини у учун қулай бўлган ҳар қандай вақтда Москвада қабул қиламиз», — деди Путин.

20 апрель куни Зеленский Путинга Украинанинг Донбассидаги уруш кетаётган исталган жойида учрашишни таклиф қилди. Россия президентининг таъкидлашича, Украина томони айнан нимани муҳокама қилмоқчи, деган савол туғилади. Путиннинг фикрига кўра, агар гап Донбасс муаммолари ҳақида борадиган бўлса, унда, авваламбор, Украина раҳбарияти ЛХР ва ДХР республикалари раҳбарлари билан учрашиши керак ва шундан кейингина ушбу муаммоларни учинчи мамлакатлар вакиллари, хусусан, Россия билан муҳокама қилиши лозим».

Шунингдек, Путин Беларусь президенти Александр Лукашенко билан учрашувда Украина билан муносабатларга тўхталиб ўтди.

Путиннинг сўзларига кўра, Украина ҳукумати икки томонлама муносабатларни бузадиган кўплаб қадамларни ташлаган. «Бу рус православ черковига бўлган муносабат, уни йўқ қилишга уринишлар билан боғлиқ. Бу рус тилига ва Украинанинг русийзабон фуқароларига ҳамда Украинада яшовчи Россия фуқароларига бўлган муносабат билан боғлиқ», —  деди у.

Владимир Зеленский ўзининг Telegram каналига жойлаштирилган видеомурожаати орқали Путинни Донбассда учрашишга таклиф қилиш чоғида агар Украина ва Россия ўртасида уруш юз берса, бу минглаб одамлар ҳаётига таъсир қилиб, охир-оқибат иккала томон ҳам ютқазишини айтган. Шунингдек, Украина президенти «танкда тинчлик ўрнатиш мумкин эмас», деб қўшимча қилган.

Кремль Зеленскийнинг таклифига изоҳ бериб, Путин агар зарур деб билса, унга шахсан жавоб беришини айтган эди.  Шу билан бирга, Кремль вакили Димитрий Песков Путин билан учрашув тўғрисида Зеленский томонидан яқин орада расмий сўровлар бўлмаганини таъкидлаган.