NASA’нинг Ingenuity вертолёти Марсда иккинчи муваффақиятли парвозини амалга оширди

Марсга Perseverance марсоходи билан бирга етиб келган Ingenuity вертолёт-дрони 22 апрель куни иккинчи марта муваффақиятли автоном парвозни амалга оширди, деб ёзади «Интерфакс» NASA’га таяниб.

Ingenuity вертолёти беш метргача баландликка кўтарилди. Сайёра юзаси узра бироз муаллақ тургач, вертолёт 5 даражага оғди ва ён томонга қараб 2 метр масофага учди. Шундан сўнг у яна муаллақ турди, сўнг турли томонларга бурилиб, ўзининг рангли камераларини ишга солди. Сўнгра у қўниш учун ўз «аэродроми»га йўл олди. Бутун парвоз, тахминан, 50 сония давом этди.

19 апрель кунги муваффақиятли синов парвози чоғида вертолёт 3 метр баландликка кўтарилган ва Марс юзаси узра 39 сония вақт ўтказган эди.

Аввалроқ NASA бутун операция буйруқлар асосида автоном тарзда амалга оширилишини маълум қилганди, буйруқлар эса Perseverance марсоходига юборилган, ундан Ingenuity вертолётига узатилган.

Ingenuity 31 кун ишлашга мўлжалланган. У яна камида учта парвозни амалга ошириб, марсоход атрофидаги ҳудудни аэрофотосъёмка қилиши керак.

Дроннинг диаметри 1,2 метр, оғирлиги тахминан 1,8 кг бўлиб, уни ишлаб чиқиш учун 85 миллион доллар сарфланган. У иккита камера билан жиҳозланган ва суратга олиш учун ҳавода 20—30 сония давомида муаллақ тура олади. NASA аввалроқ бундай қурилма учун асосий муаммо Марс атмосферасининг ўта сийраклигидан иборат бўлишини маълум қилганди. «Марс атмосферасининг зичлиги Ерникининг атиги 1 фоизига тенг, шу сабабли вертолёт шунчаки сайёра юзасида турган вақтида ҳам бу унинг учун Ердаги 30 км баландликка тенг бўлади», — деган эди лойиҳа муаллифи.

Ingenuity Марсга Perseverance марсоходи билан бирга етиб келган. Марсоход ортилган ракета 2020 йил июлида Флорида штатида жойлашган Канаверал бурнидаги космодромдан учирилган эди. Февралда Америка ровери Езеро кратерига бориб қўнди. Бунгача сунъий йўлдошдан олинган маълумотлар ёрдамида у ерда катта кўлга бориб қуйилган дарё ўзани излари аниқланган эди. Олимлар фикрича, кратерда ҳаёт излари сақланиб қолган бўлиши мумкин.