Туркманистон президенти Гурбангули Бердимуҳамедов ўз ўғли, бош вазир ўринбосари, Олий назорат палатаси раиси ва «Туркман алабайи» Халқаро ассоциацияси раҳбари Сердар Бердимуҳамедовни «Туркманистонда хизмат кўрсатган итбоқар» унвони билан тақдирлади. Бу ҳақда Central Asia хабар берди.
Давлат раҳбарининг тегишли фармони 21 апрель куни имзоланди, деб хабар берган Туркманистон телевидениесининг «Ватан» янгиликлар дастури.
Сердар Бердимуҳамедов ушбу фахрий унвонга «Туркманистон мустақиллиги йилларида замонавий дунё илм-фан ютуқларидан фойдаланиш, дунёда алабайлар шон-шарафини ошириш, тизимли парваришлаш ва наслчилик масалаларида эришган катта ютуқлари учун, туркман халқининг бой маданий меросининг ажралмас қисми бўлган миллий селекцияни ривожлантиришда ва такомиллаштиришдаги кўп йиллик виждонли ва фидокорона меҳнатни ҳисобга олган ҳолда, миллий кинологик мактабнинг энг яхши анъаналарини оммалаштиришдаги катта ютуқлари учун, қолаверса, Алабай куни муносабати билан» лойиқ деб топилди, — дейилади президент фармонида.
Сердар Бердимуҳамедовга кўкрак нишони ва сертификат топширилди.
Туркманистонда Бердимуҳамедов ташаббуси билан жорий этилган алабай ити шарафига байрам куни апрель ойининг ҳар сўнгги якшанбасида нишонланади.
Аввалроқ Туркманистонда бир марталик мукофот пуллари ва ойлик пул маблағлари беришни кўзда тутувчи халқ итбоқари ва хизмат кўрсатган итбоқар унвонлари таъсис этилгани ҳақида хабар берилганди.
Эслатиб ўтамиз, 2017 йилда Туркманистон президенти Россия президенти Владимир Путинга алабай кучугини совға қилган, кучукка «Содиқ» лақаби берилган. 2019 йилнинг майида у Россия собиқ бош вазири Дмитрий Медведевга ҳам алабай совға қилган. 2020 йил ноябрь ойида Бердимуҳамедов Ашхободда алабай итига атаб ўрнатилган олтин ҳайкални очиб берганди.
Туркман алабайи ёки бўрибосар ити — Ўрта Осиё чўпон итининг бир тури. Ахалтеке оти билан бир қаторда, алабай Туркманистоннинг миллий бойлиги ҳисобланади. Мамлакатда расмий рухсатсиз зотли ҳайвонларни хорижга экспорт қилиш тақиқланади.
Изоҳ (0)