АҚШнинг икки нафар сенатори яқинда Tesla электромобиллари билан содир бўлган ЙТҲдан кейин, Йўл ҳаракати хавфсизлиги миллий бошқармасини (National Highway Traffic Safety Administration, NHTSA) ҳайдовчиларга ёрдам бериш тизимларининг сифатини яхшилаш мақсадида автомобиль ишлаб чиқарувчилар учун тавсиялар ишлаб чиқишга чақирди, деб ёзмоқда The Wall Street Journal.
«Ушбу транспорт воситалари билан боғлиқ хавфсизлик муаммолари одатий ҳолга айланиб бораётганидан хавотирдамиз. Бу ҳол одамни жиддий ташвишга солади ва эътибор қаратишингизга лойиқ масала ҳисобланади», — деди демократ сенаторлар Ричард Блументал ва Эд Марки NHTSA’га йўллаган мурожаатида.
20 апрель куни NHTSA 19 апрелда содир бўлган ҳалокатли ЙТҲни текширишни бошлади. Умумий ҳисобда назоратчилар Tesla автомобиллари билан боғлиқ бўлган йигирмадан ортиқ бахтсиз ҳодисаларни текширди ва уларнинг аксарияти ҳайдовчиларга ёрдам бериш тизимидан фойдаланиш билан боғлиқлиги аниқланди.
Аввалроқ Техас штатининг Вудлендс шаҳрида 2019 йилда ишлаб чиқарилган Tesla Модель S автомобили дарахтга урилиб, ёниб кетиши оқибатида машина ичидаги икки киши ҳалок бўлган эди. Полиция маълумотларига кўра, машина автопилот режимида бўлган.
Лекин Tesla компаниясининг раҳбари Илон Маск ЙТҲга учраган автомобилнинг автопилот режимида бўлмаганини таъкидлади.
Автоҳалокатдан бир неча соат олдин Илон Маск Twitter’да Teslaнинг автопилоти ҳақида пост қолдирди. «Автопилот ўрнатилган Tesla’да автоҳалокатга учраш эҳтимоли ўртача автомобиллардан 10 баравар кам», — деб ёзган Tesla бош директори.
Tesla автопилот режими ҳайдовчининг ўрнини боса олмаслигини ҳамда функциядан фойдаланишда йўлни кузатиш ва вазиятни бошқариш кераклигини бир неча бор таъкидлаган. «Автопилот ва тўлиқ ўзини ўзи бошқариш функцияси қўлларини автомобиль рулидан олмайдиган ва исталган вақтда бошқарувни ўз зиммасига олишга тайёр бўлган ҳайдовчининг доимий назорати остида фойдаланилиши керак», — дейилади компания сайтида.
Шунингдек, Хитойнинг Гуанчжоу шаҳрида Tesla автомобили жиддий ЙТҲга учради. ЙТҲ оқибатида электромобилнинг аккумулятори ёниб кетган. Бир неча дақиқада олов бутун машинани қамраб олган ва натижада ундан фақат каркас қолган.
Бундан ташқари, Шимолий Каролина штатида автопилотда ҳаракатланаётган Tesla Модель S иккита полиция автомобили билан тўқнашув содир этгани, яна бир Tesla Модель 3’нинг рули ҳаракат вақтида узилиб тушгани, Хитойда Tesla автопилоти соатига 127 километр тезликда ҳаракатланиб, ЙТҲга учрагани тўғрисида хабар берилган эди.
Изоҳ (0)