Кремлда Россия президенти Владимир Путин ва Беларусь президенти Александр Лукашенко ўртасида қарийб тўрт соатлик музокаралар бўлиб ўтди. Бу ҳақда Россия президентининг матбуот котиби Дмитрий Песков маълум қилди, деб ёзади Meduza.
Маълум қилинишича, учрашув уч соат 55 дақиқа давом этди. Песковнинг сўзларига кўра, сиёсатчилар мамлакатлар ўртасидаги иқтисодиёт, асосан саноат, энергетика, тиббиёт ва юқори технологиялар соҳасидаги ўзаро муносабатларни муҳокама қилди. «Бундан ташқари, биз тегишли идоралар орқали ўтган даврда ҳукумат даражасида амалга оширилган ишларни сарҳисоб қилдик», — деб қўшимча қилди Песков.
Музокаралар бошланишидан олдин Лукашенко Беларусь ва Россия интеграция бўйича 26-27 йўл хариталарини келишиб олгани ҳақида маълум қилган эди. «Кўп нарса қолмади, иқтисодий характерга эга икки-учта ўта жиддий дастур, хусусан солиққа тортиш масалалари қолган», — дея қўшимча қилган эди Лукашенко.
Беларусда экспертлар Кремлда бўлиб ўтган музокаралардан сўнг, Путин ва Лукашенко кейинги интеграция тўғрисида, масалан, Беларусда Россия ҳарбий базасини жойлаштириш тўғрисида эълон қилиши мумкин деб тахмин қилган.
17 апрель куни Лукашенко тез орада ўзининг «чорак асрлик президентлиги давридаги асосий қарорларидан» бирини эълон қилишини маълум қилган эди. У қандай қарор бўлишига аниқлик киритмаган.
Шу куни Беларусь Давлат хавфсизлик қўмитаси ҳокимиятни эгаллашга уриниш ҳамда Лукашенко ва унинг оила аъзолари ҳаётига суиқасд қилишнинг олди олингани тўғрисида хабар берди. Москвада ФХХ (Федерал хавфсизлик хизмати) ёрдамида фитна иштирокчиси деб гумон қилинган икки киши— Беларусь сиёсатшуноси Александр Федут ва адвокат Юрий Зенкович ҳибсга олинган. Лукашенконинг айтишича, суиқасд ортида АҚШ махсус хизматлари турган.
АҚШ Лукашенкога нисбатан суиқасдга алоқаси борлигини рад этди. 21 апрель куни Путин Федерал Мажлисга йиллик мурожаати чоғида , Ғарб давлатлари Лукашенкога қарши суиқасдни пайқамаганини ва қораламаганини таъкидлади.
Изоҳ (0)