AQShning Texas shtatidagi Vudlends shahrida avtopilot rejimida harakatlangan Tesla elektromobilining katta tezlikda daraxtga urilishi natijasida ikki kishi halok bo‘ldi. Bu haqda The Wall Street Journal xabar berdi.
Foto: Scott Engle
To‘qnashuvdan keyin mashina yonib ketdi. Yong‘inni bartaraf etish uchun o‘t o‘chiruvchilar to‘rt soat vaqt sarfladi.
Oqibatda avtomobilda bo‘lgan ikki kishi halok bo‘ldi, ularning biri mashinaning old o‘rindig‘ida, ikkinchisi esa orqa o‘rindiqda bo‘lgan.
“Dastlabki surishtiruv ishlari hali yakunlanmadi, lekin bizga hozircha avtomobil boshqaruvida hech kim bo‘lmagani ma’lum. Bunga 99 foiz ishonchimiz komil”, — deb izoh berdi okrug politsiyachisi Mark Herman.
Shuningdek, politsiya avariya vaqtida himoya yostiqchalarining ishlagan-ishlamaganligini ham tekshirmoqda.
Avvalroq Florida shtatining Miramar shahrida soatiga 160 kilometr tezlikda harakatlangan Tesla Model S bir nechta daraxt, avtoturargohdagi ikkita avtomobil va yo‘l chetidagi uylardan biriga urilib, haydovchining omon qolgani haqida xabar berildi.
Shuningdek, Shimoliy Karolina shtatida avtopilotda harakatlanayotgan Tesla Model S ikkita politsiya avtomobili bilan to‘qnashuv sodir etgani, shuningdek, Tesla Model 3’ning ruli harakat vaqtida uzilib tushgani, Xitoyda Tesla avtopiloti soatiga 127 kilometr tezlikda harakatlanib, YTHga uchragani to‘g‘risida xabar berilgandi.
