АҚШнинг Россиядаги элчиси Жон Салливан Вашингтонга қайтиб кетди, деб ёзади «РБК».
«Мен қайтиб келганимдан хурсандман, оиламни ва маъмуриятдаги ҳамкасбларимни кўришни сабрсизлик билан кутяпман», — деди элчи журналистларга Вашингтондаги Даллес халқаро аэропортида.
Аввалроқ АҚШнинг Россияга қарши янги санкцияларидан сўнг Кремль элчига маслаҳатлашувлар учун АҚШга қайтиб кетишини тавсия қилган эди. Бироқ Салливан Кремлнинг тавсияларига қарамай, мамлакатни тарк этишдан бош тортган.
Аммо кейинроқ Axios нашри Давлат департаменти вакилига таяниб, АҚШнинг Россиядаги элчиси Жон Салливан шу ҳафта Вашингтонга жўнаб кетиб, у ерда бир неча ҳафта туриши, сўнг эса яна қайтиб келишини маълум қилганди.
Россияга қарши янги санкциялар билан бирга, АҚШ мамлакатдан 10 нафар россиялик дипломат чиқариб юборилиши ҳақида эълон қилди. Польша АҚШнинг Россияга қарши санкцияларини қўллаб-қувватлади. Польша Варшавадаги уч нафар россиялик дипломатни persona non grata деб эълон қилди, улар мамлакатдан чиқариб юборилади. Россия Ташқи ишлар вазирлиги бунга худди шу тарзда жавоб қилишини маълум қилди.
16 апрелда Москва 10 нафар америкалик дипломатни мамлакатдан чиқариб юбориш тўғрисида ўзаро қарор қабул қилганини эълон қилди. Ташқи ишлар вазирлиги мазкур чоранинг Вашингтондаги элчихона ва Нью-Йоркдаги консулликда россиялик дипломатларга нисбатан қўлланилган душманона сиёсат, уларнинг асоссиз равишда persona non grata шахслари деб эълон қилинганига жавоб сифатида қўлланилганини қайд этган.
Ушбу воқеалар ортидан Салливан Россия ТИВга «оғир мулоқот» учун борди, у ерда президент ёрдамчиси Юрий Ушаков унга маслаҳатлашувлар учун Вашингтонга қайтиб кетишни тавсия қилди. Бундан ташқари, Ушаков Салливанга Москванинг АҚШ янги санкцияларига жавоб чораларини баён қилди.
Изоҳ (0)