Xitoyning Guanchjou shahrida Tesla avtomobili jiddiy YTHga uchradi, deb yozmoqda Tengrinews.
Foto: Skrinshot
Jamoat xavfsizligi byurosining xabariga ko‘ra, YTH bir necha kun oldin Guanchjou shahrining Szenchen tumanidagi Dunszyan shoh ko‘chasining shimolida sodir bo‘lgan. Lekin politsiya voqea haqida 22-aprel kuni xabar berdi. Amerikalik ishlab chiqaruvchining elektromobili oldinda ketayotgan transportni quvib o‘tishga uringanida beton to‘siqqa borib urilgan.
YTH oqibatida elektromobilning akkumulyatori yonib ketgan. Bir necha daqiqada olov butun mashinani qamrab olgan va natijada undan faqat karkas qolgan.
Dastlabki surishtiruvlarga ko‘ra, Tesla’dan tashqari, YTHda yana bir avtomobil ishtirok etgan. Hodisaning aniq sababi hozircha o‘rganilmoqda.
Tesla vakili avtohalokat sodir bo‘lgani haqidagi xabarni tasdiqladi va kompaniyaning keyingi tekshiruvlarda yo‘l harakati politsiyasi bilan hamkorlik qilayotganini aytdi.
Ta’kidlash joizki, so‘nggi kunlarda Amerikaning elektromobil ishlab chiqaruvchisi OAVda sifat nazoratidagi muammolar uchun tanqid qilinmoqda. Avvalroq avtopilot rejimida harakatlangan Tesla avtomobilining daraxtga urilib, yonib ketishi oqibatida ikki kishi halok bo‘lgan edi.
Lekin kompaniya asoschisi Ilon Mask YTH paytida avtomobil avtopilot rejimida bo‘lgani haqidagi ma’lumotni rad etdi. Tesla elektromobillari ishtirokidagi YTHda odamlarning halok bo‘lgani haqidagi yangiliklardan keyin kompaniya aksiyalari 6,5 foizga tushib ketdi.
Avvalroq Florida shtatining Miramar shahrida soatiga 160 kilometr tezlikda harakatlangan Tesla Model S bir nechta daraxt, avtoturargohdagi ikkita avtomobil va yo‘l chetidagi uylardan biriga urilib, haydovchining omon qolgani haqida xabar berilgandi.
Shuningdek, Shimoliy Karolina shtatida avtopilotda harakatlanayotgan Tesla Model S ikkita politsiya avtomobili bilan to‘qnashuv sodir etgani hamda Tesla Model 3’ning ruli harakat vaqtida uzilib tushgani, Xitoyda Tesla avtopiloti soatiga 127 kilometr tezlikda harakatlanib, YTHga uchragani to‘g‘risida xabar berilgandi.
