Ўрта Ер денгизида бортида жами 130 га яқин ноқонуний муҳожир бўлган учта қайиқ ғойиб бўлди. Улар ҳалокатга учраб, чўкиб кетган бўлиши мумкин, дея хабар берди «РБК» Европанинг SOS Mediterranee гуманитар ташкилотига таяниб.
Маълум бўлишича, ташкилотга Ливия қирғоғида ҳалокатга учраётган учта кема тўғрисида хабар келиб тушган. SOS Mediterranee’нинг Ocean Viking кемаси ва яна учта савдо кемаси қидирувга йўл олган. Бироқ ёмон об-ҳаво шароити ва олти метргача баландликдаги тўлқинлар уларнинг ишини мураккаблаштирган.
«Бугун воқеа жойига келганимиздан бери, тирик қолган бирон кишини топмадик, аммо ҳалокат содир бўлган жойда камида ўн кишининг жасадига дуч келдик», — дейилади хабарда. Ташкилот масъул денгиз органларидан ҳеч қандай ёрдам олмаганини айтди.
Ноқонуний муҳожирлар кўпинча Африкадан ёки Яқин Шарқдан Ўрта Ер денгизи орқали Европага қочишга ҳаракат қилади. 2018 йилда БМТ ушбу йўналишни миграция ҳаракати бўйича энг хавфли деб топди.
Аввалроқ Индонезиянинг Бали оролида бортида 53 нафар денгизчи бўлган сувости кемаси бедарак йўқолган эди. Шунингдек, Бангладешнинг Шиталакшя дарёсида 50 нафар йўловчини олиб кетаётган паром (солсимон ясси кема) юк ташувчи кема билан тўқнашиб, чўкиб кетиши натижасида беш киши ҳалок бўлган.
Унгача Ўрта Ер денгизининг Тунис қирғоқлари яқинида эса ичида ноқонуний кўчаётган муҳожирлар бўлган иккита қайиқ ағдарилиб, чўкиб кетган эди. Қайиқлар Италиянинг Лампедуза ороли томон кетаётган эди. Ҳалокат оқибатида камида 39 киши ҳалок бўлган.
Изоҳ (0)