Хитойнинг Гуанчжоу шаҳрида Tesla автомобили жиддий ЙТҲга учради, деб ёзмоқда Tengrinews.
Жамоат хавфсизлиги бюросининг хабарига кўра, ЙТҲ бир неча кун олдин Гуанчжоу шаҳрининг Сзенчен туманидаги Дунсзян шоҳ кўчасининг шимолида содир бўлган. Лекин полиция воқеа ҳақида 22 апрель куни хабар берди. Америкалик ишлаб чиқарувчининг электромобили олдинда кетаётган транспортни қувиб ўтишга уринганида бетон тўсиққа бориб урилган.
ЙТҲ оқибатида электромобилнинг аккумулятори ёниб кетган. Бир неча дақиқада олов бутун машинани қамраб олган ва натижада ундан фақат каркас қолган.
Дастлабки суриштирувларга кўра, Tesla’дан ташқари, ЙТҲда яна бир автомобиль иштирок этган. Ҳодисанинг аниқ сабаби ҳозирча ўрганилмоқда.
Tesla вакили автоҳалокат содир бўлгани ҳақидаги хабарни тасдиқлади ва компаниянинг кейинги текширувларда йўл ҳаракати полицияси билан ҳамкорлик қилаётганини айтди.
Таъкидлаш жоизки, сўнгги кунларда Американинг электромобил ишлаб чиқарувчиси ОАВда сифат назоратидаги муаммолар учун танқид қилинмоқда. Аввалроқ автопилот режимида ҳаракатланган Tesla автомобилининг дарахтга урилиб, ёниб кетиши оқибатида икки киши ҳалок бўлган эди.
Лекин компания асосчиси Илон Маск ЙТҲ пайтида автомобиль автопилот режимида бўлгани ҳақидаги маълумотни рад этди. Tesla электромобиллари иштирокидаги ЙТҲда одамларнинг ҳалок бўлгани ҳақидаги янгиликлардан кейин компания акциялари 6,5 фоизга тушиб кетди.
Аввалроқ Флорида штатининг Мирамар шаҳрида соатига 160 километр тезликда ҳаракатланган Tesla Model S бир нечта дарахт, автотураргоҳдаги иккита автомобиль ва йўл четидаги уйлардан бирига урилиб, ҳайдовчининг омон қолгани ҳақида хабар берилганди.
Шунингдек, Шимолий Каролина штатида автопилотда ҳаракатланаётган Tesla Model S иккита полиция автомобили билан тўқнашув содир этгани ҳамда Tesla Модель 3’нинг рули ҳаракат вақтида узилиб тушгани, Хитойда Tesla автопилоти соатига 127 километр тезликда ҳаракатланиб, ЙТҲга учрагани тўғрисида хабар берилганди.
Изоҳ (0)