Жисмоний имконияти чекланган бўлишига қарамай, ушбу актёрлар кинематографияда муваффақиятга эришган, чунки улар ногиронликни тўсиқ эмас, ўзига хослик деб қабул қилган ҳамда катта экран орқали санъатда ҳеч қандай чеклов йўқлигини исботлашган.
Питер Динклейж
Питер Динклейжнинг бўйи туғма ахондроплазия туфайли 135 сантиметрни ташкил этади. Оилада бу касаллик фақат Питерда кузатилган. У ўз фаолиятини 26 ёшида бошлаган.
Динклейжга биринчи марта 2003 йилда “Вокзал назоратчиси” драмаси экранларга чиққандан сўнг эътибор қаратилди. Бу иш томошабинларни Динклейжга иккинчи даражали кулгили персонаж сифатида эмас, балки тўлақонли драматик актёр сифатида қарашга ундади.
2011 йилга келиб, “Элф”, “Нарния йилномалари: Шаҳзода Каспиан” ва бошқа кўплаб фильмларда суратга тушишга улгурган таниқли актёр эди.
Лекин унга ҳақиқий машҳурликни унга айнан “Тахтлар ўйини” сериалидаги роли келтирди. Питер ролга кастингсиз таклиф қилинган кам сонли актёрлардан бири бўлди. Жорж Мартин Тирион Ланнистер персонажини Питер маромига етказиб ўйнай олишига ишонган. Бу образ учун у “Эмми”, “Олтин глобус” ва “Спутник” каби кўплаб мукофотларга сазовор бўлди.
Шунингдек, Динклейк “Сирана”, “Қасоскорлар: Абадият уруши”, “Ғаройиб одамлар”, “Эббинг, Миссури чегарасидаги учта реклама тахтаси” каби машҳур фильмларда ҳам суратда тушган.
Жейми Брюер
Жейми Брюер Даун синдроми билан туғилган, лекин актриса бўлиш орзусидан воз кечмаган. У актёрлик санъатини ихтисослашган коллежда ва Лос Анжелесдаги The Groundlings мактабида ўрганди. Сўнг “Америка даҳшатлари тарихи” сериалида суратга тушди ва шу тариқа йирик фильмда иштирок этган биринчи Даун синдромли актриса бўлди.
2015 йилда эса Брюер мода оламига қадам босди ва Нью Йорк мода ҳафталигида Carrie Hammer кўргазмасида подиумга чиққан биринчи Даун синдромли моделга айланди. Жейми ногиронлиги бўлган инсонларга жамиятнинг бугунги муносабатини ўзгартиришни истайди:
“Ёш қизлар менга қараб, ҳамма нарсанинг иложи борлигини тушунишларини истайман. Ҳар бир инсон ўзлигидек қолишга ҳақли”, деган эди у интервьюларидан бирида.
Карел Стрейкен
Голландиялик актёр Карел Стрейккеннинг бўйи 2,13 метр. Унга “гигантизм” ташхиси қўйилган бўлса ҳам, болалигидан кино оламига интилган. Аввал Амстердамда кино мактабини, кейинроқ Лос Анжелесдаги Америка кино институтини тугатган. Голливудда унга кўпинча сокин, сирли, ҳайбатли қиёфали қаҳрамонлар роли таклиф этилган.
Унинг энг таниқли роли “Аддамслар оиласи” фильмидаги Ларч исмли хизматчи образи бўлди. Актёр иштирокидаги “Твин Пикс”, “Юлдузли йўл: Келажак авлод”, “Иствиг жодугарлари”, “Доктор Сон” ва “Қора либосли одамлар” фильмлар ҳам машҳур.
Стрейкен ҳозирда Лос Анжелесда яшайди. У оила қурган ва икки нафар фарзанди бор.
Жамел Деббуз
1990 йил январь ойида, Жамел 14 ёш бўлган вақтда темирйўл станциясида дўсти Жан Пол билан бирга поезд уриб кетган. Поезд 150 км/соат тезликда ҳаракатланаётган бўлган. Жан Пол ҳалок бўлган, Жамел эса оғир жароҳат олиб, ўнг қўли буткул ишламай қолган ва ривожланишдан тўхтаган. Дўстининг оиласи уни айблаган бўлса-да, расмий тергов Жамелнинг айбсизлигини тасдиқлаган.
Машҳур француз актёри ҳар доим ўнг қўлини чўнтагига солиб юради ва бунга кўпчиликнинг эътиборини тортмайди. Аммо бундай жароҳат унга буюк актёр ва комик бўлишга халал бермади. У “Амели”, “Астерикс ва Обеликс: Клеопатра миссияси”, “Анжел-А” каби фильмлардаги роллари билан француз киносининг энг машҳур юлдузига айланди.
Уорвик Дэвис
Кунларнинг бирида Уорвик Дэвиснинг бувиси “Юлдузлар жанги” фильмининг янги қисми учун 120 см дан паст бўйли актёрлар излаётгани ҳақида эълонга кўзи тушади. Уорвикнинг бўйи эса ўша вақтда атиги 107 см эди. Шу тариқа, у ўсмир пайтида афсонавий фильмда эвуклар образида суратга тушди. 1987 йилда эса “Уиллоу” фильмида бош ролни ижро этди ва энг машҳур митти актёрлардан бирига айланди. Уорвик “Гарри Поттер”да профессор Флитвик ролини ижро этган. Шунингдек, “Лепрекон”, “Ўнинчи қироллик”, “Доктор Ким” каби лойиҳаларда суратга тушган.
Изоҳ (0)