WSJ: Байден арманлар геноцидини тан олишга тайёр

АҚШ президенти Жо Байден 20-аср бошларида арман миллатига қарши амалга оширилган оммавий қирғинни геноцид сифатида тан олишга тайёр. Бу ҳақда The Wall Street Journal’ига асосланиб, «РБК» хабар берди.

Хабарга кўра, президент арманларга қарши 1915 йилдан бошлаб Усмонли турклар томонидан амалга оширилган депортация, очарчилик ва қотилликни геноцид деб аташи мумкин. Бу ҳақда Байден ушбу воқеаларни ёдга олиш куни бўлган 24 апрель, шанба куни президентнинг йиллик мурожаати чоғида баёнот эълон қилиши мумкин.

Шу билан бирга, газета манбалари якуний қарор қабул қилинмаганини ва Байден ўзидан аввалги президентлар сингари геноцид ҳақида сўз юритмасдан, рамзий мурожаат билан чекланиши ҳам мумкинлигини қўшимча қилди.

Бир кун олдин Associated Press конгрессменларнинг Байденни арманлар геноцидини тан олишга чақирган баёнотини эълон қилди. Конгресснинг 100 дан ортиқ аъзолари баёнотни имзолаган.

Унда Байденга 2019 йилда айтган сўзлари эслатилган: АҚШ арманлар геноциди мавжудлигини «узил-кесил» тасдиқлаши керак. «Геноцид фактини эслай олмаслик ёки тан олмаслик келажакдаги улкан жиноятлар учун йўл очиб беради», — деган эди Байден ўша пайтда.

Март ойида таркибида иккала партия аъзолари бўлган сенаторлар гуруҳи Байденга худди шундай хат билан мурожаат қилган эди.

WSJ АҚШнинг арманлар геноцидини тан олиши Туркия билан муносабатларга таъсир қилиши мумкинлигидан огоҳлантиради. Бу ҳақда 20 апрель куни Туркия ташқи ишлар вазири Мевлут Чавушўғли айтиб ўтди. Хусусан, унинг таъкидлашича, агар Вашингтон Анқара билан муносабатларни ёмонлаштирмоқчи бўлса, унда бу унинг танловидир.

Турли хил ҳисоб-китобларга кўра, арманларга нисбатан қирғин пайтида 660 мингдан 1,5 миллионгача одам ўлдирилган. Туркия ҳам Озарбайжон сингари 1915 йил воқеаларини геноцид деб тан олмайди, аммо ушбу халқ орасида кўплаб қурбонлар бўлганини инкор этмайди. 2014 йилда Туркия бош вазири Ражаб Тоййиб Эрдўғон мамлакат парламентида нутқ сўзлаб, ХХ аср бошларида арман миллатига қарши амалга оширилган оммавий қирғин натижасида ҳалок бўлганларнинг авлодларига илк бор ҳамдардлик билдирган эди.