АҚШ россиялик сенатор ва тадбиркор Сулейман Каримовга тегишли 325 миллион долларлик ҳашаматли яхтани ёпиқ кимошди савдосига қўйди. Бу ҳақда NBC News хабар берди.
“Амадеа” номли яхта 2022 йилда мусодара қилинган бўлиб, ёпиқ аукцион 10 сентябрь куни ўтказилади. Иштирокчилар аукционга кириш учун 10 миллион доллар миқдорида гаров пули тўлаши шарт. Яхтанинг бозор қиймати 325 миллион доллар атрофида баҳоланади, бироқ савдода у арзонроқ нархда сотилиши мумкин.
“Амадеа” 2022 йил апрель ойида божхона рухсатисиз Фижининг мутлақ иқтисодий ҳудудига кирганида ушланган. 3 май куни Фижи суди кемани АҚШга мусодара қилишга рухсат берган. Узунлиги 106 метр бўлган яхта вертолёт майдончаси, ҳовуз, денгиз қисқичбақаси учун аквариум ва қўлда безатилган роялга эга. Аукцион сайтида унинг олтита палубаси ва ички қисми батафсил тасвирланган суратлар жойлаштирилган.
Федерал қидирув бюроси ҳужжатларида яхтанинг ҳақиқий эгаси сифатида Сулейман Каримов кўрсатилган. Бироқ расмий ҳужжатларда у “Роснефть” собиқ бош директори Эдуард Худайнатов номида расмийлаштирилган. Худайнатов, шунингдек, президент Владимир Путинга тегишли деб ҳисобланган “Шаҳризода” яхтасининг ҳам расмий эгаси сифатида қайд этилган.
Megayacht News нашрига кўра, “Амадеа” Россиянинг Украинага кенг кўламли ҳужуми муносабати билан мусодара қилинган биринчи яхта ҳисобланади. Уни сотишга яхтани сақлаш харажатларининг юқорилиги сабаб бўлмоқда. Чунки экипаж ва хизмат кўрсатиш учун ойлик харажатлар 922 минг доллар атрофида баҳоланади.
Изоҳ (0)