Ҳиндистондаги эпидемиологик вазият ёмонлашишда давом этмоқда: тўрт кун ичида мамлакатда бир миллион кишида COVID-19 аниқланди. Бу ҳақда Times of India нашрига таяниб, «Интерфакс» хабар берди.
Бу коронавируснинг мамлакатда тарқалиш даражаси бўйича янги рекорд. Аввалроқ, олти кун ичида Ҳиндистонда бир миллион янги касалланиш ҳолати қайд этилганди.
Хабарга кўра, сўнгги 24 соат ичида Ҳиндистон ҳукумати COVID-19’га чалиниш бўйича 295 мингдан ортиқ янги ҳолатни рўйхатдан ўтказди. Бу пандемия бошланганидан бери мамлакатда кунлик инфекцияланиш сонининг юқорилиги бўйича иккинчи ва 200 мингдан ортиқ янги ҳолат аниқланган еттинчи кун. 21 апрель куни касалликдан вафот этганлар сони икки мингдан ошди.
Шунга қарамай, Ҳиндистон бош вазири Нарендра Моди қатъий локдаун ўрнатишга қарши.
«Мен давлатларни локдаун ўрнатишни сўнгги чора сифатида кўришга чақираман. Улар локдаунгача олиб бормаслик чораларига чин дилдан ёндашишга ва диққатини инфекциянинг микрозоналарига қаратишга ҳаракат қилиши керак», — деди Моди.
Маълум бўлишича, касалланганлар сонининг ортиши фонида Ҳиндистон касалхоналарининг реанимация бўлимларида ётоқ ва тиббий кислород етишмаяпти. Деҳли бош вазири Арвинд Кежривалнинг айтишича, агар янги юқтиришлар сони камаймаса, соғлиқни сақлаш тизими қулаши мумкин.
Ҳиндистонда пандемия бошланганидан буён 15 миллиондан ортиқ одам коронавирус билан касалланган, 180 мингдан ортиғи вафот этган.
12 апрель куни Ҳиндистонда коронавирусга қарши Россиянинг «Спутник V» вакцинасидан фавқулодда ҳолатларда фойдаланишга рухсат берилди.
Изоҳ (0)