Шимолий Кореяда коронавирус тарқалишига қарши кураш учун ўрнатилган қаттиқ чекловлар шароитида халқаро гуманитар ташкилотлар, хусусан Жаҳон озиқ-овқат дастурининг сўнгги ходимлари, мамлакатни тарк этишга мажбур бўлди. Бу ҳақда Россия Ташқи ишлар вазирлигининг Халқаро ташкилотлар департаменти директори Пётр Ильичевга таяниб, «Коммерсантъ» хабар берди. Шимолий Кореяда COVID-19 инфекцияси бўйича ҳали бирорта ҳолат расмий равишда қайд этилмаган.
«COVID-19 пандемияси муносабати билан Шимолий Корея ҳукумати чегараларни ёпди. Халқаро ташкилотлар ўз кадрларини алмаштириш имкониятидан маҳрум бўлди, чет элдан гуманитар ёрдам етказиб бериш тўсиб қўйилди. 2020 йилнинг августидан бери Шимолий Кореяга битта ҳам контейнер киритилмаган», — деди Ильичев.
Таъминот етишмаслиги сабабли, гуманитар ташкилотларнинг вакиллари март ойида мамлакатни тарк этишни бошлади. «Таъминотларнинг узилиши, омборларнинг бўшатилиши, ёқилғи етказиб берилишидаги узилишлар фонида гуманитар ташкилотлар фаолиятининг кутилган самарадорлиги ҳақиқатан ҳам йўққа чиқди», — дея қўшимча қилди Россия ТИВ вакили. Унинг сўзларига кўра, мамлакатдаги қаттиқ чекловларнинг бекор қилинишига ҳали бери умид йўқ.
Апрель ойида КХДР етакчиси Ким Чен Ин мамлакатда кенг миқёсда очарчилик бўлиши мумкинлигини тан олди. КХДРда вазиятнинг ёмонлашувидаги муҳим омиллардан бири бу чегаралар ёпилиши сабабли Хитой билан савдо ҳажмининг кескин пасайиши эди. Чекловлар туфайли КХДРда аллақачон 12 та элчихона ёпилган. Уларнинг ходимлари мамлакат ҳудудини тарк этган. Россия элчихонаси ходимлари уйга моторсиз темир йўл вагонлари билан қайтишга мажбур бўлган эди.
Изоҳ (0)